De Hans Schaffner isch als Direkter vo dr Handelsabteilig vo dr Bundesverwaltig wesentlich a dr Entschtehig vo dr EFTA beteiliget gsii. 1958 nach dr Gründig vo dr EWG, hät dr Schwiiz d Isolation vo dr europäische Handelspolitik droht. De Schaffner hät es Treffe mit siine Kollege us de Nöd-EWG-Schtaate organisiert, wo d Idee vonere Freihandelszone uusgarbeitet worde isch. Under dr Bezeichnig "d Beamteverschwörig" isch das Treffe i d Gschicht vo dr EFTA iigange und de Schaffner isch als Vater vo dr EFTA bezeichnet worde.
Am 15. Juni 1961 isch er in Bundesrat gwählt worde. Wege siim HeimatortGränich hät er als Vertreter vom Kanons Aargau gulte. Während siinere Amtsziit isch er em Volkswirtschaftsdepartement vorgschtande. Er hät sich schtarch für d Intergration vo dr Schwiiz in Europa engagiert und hät sich für es aktivs Mitwürke do dr Schwiiz i dr EFTA iigsetzt.
Er isch Bundespräsident gsii im Jahr 1966 und Vizepräsident im Jahr 1965.
Am 31. Dezember 1969 isch er us gsundheitliche Gründe zruggträte.
Nach siim Rücktritt us em Bundesrat und ere längere Erholigsziit hät er sich in verschiedene internationale Kommissione engagiert, under anderem i dr Expertengruppe vo dr UNO über d Tätigkeit vo multinationale Konzern i dr Dritte Welt.
Literatur
Hans Schaffner im Munzinger-Archiv (Artikelaafang frei abruefbar)
