PROFILBARU.COM

Dä Artikel isch über en See im Zürcher Oberland. Anderi Bedütige findt me under Griifesee.

Griifesee

Date
Lag:	Kanton Züri
BFS-Nr.:	9040
Flechi	8,4 km²
maximali Tüfi:	34 m
Zueflüss:	Aabach
Abfluss:	Glatt
Höchi über NN:	435 m
Grösseri Stedt am Ufer:	Uschter
Charte
Griifesee

De Griifesee lit im Kanton Züri zirka 20 km östlich vo Züri. Er isch dur d Pfannestììlchetti vom Zürisee trännt. Er isch 6 km lang und 1,6 km breit. S isch de zweitgröschti See im Kanton Züri.

Laag und Gschicht

De Griifesee liit inere Landschaft, won vom Rhy-Linthgletschär gformt worden isch. Im Weschte isch de Pfannestììl, im Oschte fangt s Zürcher Oberland aa. S Wasser vom Griifesee chunnt vor allem us em Aabach. Z Fällande flüsst d Glatt us em See use. Bis im 12. Jahrhundert hät de Griifesee drum au Glattsee gheisse. Früener isch de Griifesee bis uf Dübedorf gange, won er sich anere Ändmoräne gschtaut hät. Dur Verlandig und Melioration isch de See über d Jahrtuusig chlinner worde,^[1] was mer no guet cha gsee a de Moor rund um en ume. Sini hütigi Form hät de Griifesee, sit 1890/91 d Glatt kanalisiert worden isch.

Di erschte Mänsche händ i de Mittälsteizyt, öppe 8000 Jaar vor Chrischtus, am Seeufer gläbt. Am Oscht- und am Nordufer hät mer e paar Pfahlboute gfunde.

Im 12. Jahrhundärt hät mer z Griifesee s Schloss Griifesee pout, won im Alte Zürichrieg e Rolle gspilt hät. Am 24. April 1944 isch en abgschossne B-17-Bomber vo de Amerikaner in See gheit.

S Gebiet um de Griifesee isch sit 1941 under Naturschutz.

Nume s Stedtli Griifesee isch diräkt am Seeufer. Nideruschter, Schwärzebach, Muur und Fällande ligget hinder em Ufergürtel us Riedwise. Au Uschter und Mönchaltorf sind wiiter hine, usserhalb vom füechte Ufersträife.

Nutzig

De Griifesee isch hützutags vor alem es Naaerholigsgebiet. Rund um de See tüent d Lüüt wandere und Velo faare. Rund um de See häts mängi Badaaschtalt zum bade und schwüme. Im Härbscht ränned Sportler am Griifeseelauf um de See ume. Uf em See häts zwar vili Böötli, aber privati Motorboot sind uf em Griifesee verbote. Nume d "Schifffahrtsgsellschaft Griifesee", wo 1890 gründet worden isch, hät Motorschiff für Rundfahrte und d Personefääre vo Muur uf Nideruschter. S git ein Pruefsfischer uf em Griifesee.

Schiff uf em Griifesee

Schiff	Boujaar (Kauf)	Wärft / früenere Ort / früenere Name	usser Betriib	wo ane
Delphin (ab 1892 Möve)	1890	(ex Bodesee, Kaiserin Eugénie)	1932
Greif	1895	Escher Wyss, Züri		1988 Stiftig Tampfschiff Griif
Heimat	1933	Kaspar Burkhardt, Üürike
Forch	1937 (1946)	(ex Luganersee, Libero)	1977	EAWAG (bis 2013)
Hecht	1953 (1966)	Deggendorfer Werft, (ex DB, Bodesee)	1982	SNG,^[2] Luzärn
Salomon Landolt	1978	Lux Werft	1995	SNG, Luzärn, Dragon
Oberland	1984		2006	Chiemsee, Martin
Stadt Uster	1995
David Herrliberger	2006	Wärft vo de Schifffahrts-Gsellschaft Vierwaldstättersee

Naturschutz

Di ganz Uferzone vom Griifesee staht under Naturschutz. S Gebiet um de Griifesee isch dicht besidlet. Au d Landwirtschaft nutzt d Umgäbig starch. Drum isch de See zimli fescht mit Phosphat belaschtet gsi und d Alge sind vill z starch gwachse. Sit 1970 hät mer das Problem halbwägs im Griff. D EAWAG beobachtet de Griifesee gnau. De Phosphatghalt isch immer no zhöch und im Summer hät de See zwenig Suurstoff. Mer überläit sich drum, öb mer de See im Summer wie de Pfäffikersee sött belüfte.

Weblink

Commons: Griifesee – Sammlig vo Multimediadateie

Fuessnote

↑ Charles Knapp, Maurice Borel, Victor Attinger, Heinrich Brunner, Société neuchâteloise de géographie (Uusegäber): Geographisches Lexikon der Schweiz. Band 2: Emmenholz – Kraialppass. Verlag Gebrüder Attinger, Neuenburg 1904, S. 438 f., Stichwort Greifensee (Scan vo der Lexikon-Site).
↑ St. Niklausen Schiffgesellschaft Genossenschaft