Dr römisch Schriftsteller Cato het scho vo dr gallische Stadt Comum gschribe. Au dr Marcus Iunianus Iustinus und dr Titus Livius hend se erwäänt.[2] Ane 89 v. Chr. het dr Gnaeus Pompeius Strabo a dere Stell e Kolony gründet, und dr Gaius Julius Cäsar het ane 59 v. Chr. 5000 neui Lüüt dörthi gschickt d Kolony go z vergrössere. Ane 49 v. Chr. het dr Cäsar de Bewooner vo Comum s römische Bürgerrächt ggää.
Im Middelalter isch d Stadt under d Herrschaft vo Mailand cho. Mit Mailand zäme isch d Stadt 1714 zu Öschtrych gschlage worde, wo s au bliben isch mit eme Underbruch wärend dr Zyt vom Napoleon. Do sich Como d Hauptstadt vom französische Departemänt Lario gsi. 1859 isch d Stadt e Deil vom befreite Italie worde.
en Blick uf Como vo Brunate oben abe
Vercheer
Sid dr antike Zyt isch Como e Stazion uf em Wäg zu de Bündner Alpepäss gsi.
Dr Baanhof vo Como lyt a dr Yseebaanstrecki, wo vo Mailand zum Gottert und uf Düütschland goot. Vo Mailand us isch d Linie uf Como ane 1875 fertig bout gsi, und d Verbindig uf Chiasso zu dr Gottertbaan isch 1882 ufggange. Churz vor dr Gränze goot d Baan uf dr iteliänische Syte dur e Monte-Olimpino-Dunnel. 1990 isch dr zwöit Dunnel vom Monte Olimpino bout gsi, wo meh as sibe Kilometer läng isch und wo d Züg d Stadt Como uf ere diräkte Linie chönne umfahre.
