PROFILBARU.COM

Dr Code Postal isch die franzöösischi Bostläitzaal.

Sit 1972 bestoot dr Code us fümf Ziffere, wo die erste bäide von ene dr Ordnigszaal vom Departemänt entspräche usser uf Korsika, wo für bäidi Departemänt d Nummere 20 brucht wird. E Gmäind an ere Gränze vom ene Departemänt, wo si Bost von ere Boststell im Noochberdepartemänt überchunnt, het d Ordnigszaal vom Noochberdepartemänt. Chliini Dörfer häi mänggisch käi äigeni Bostläitzaal und bechömme die vo dr Boststell über, wo sä versorgt. Die erste bäide Ziffere für dr Code vom Milidäär si zwäi Nuller. Dr Code vo de Überseegebiet foot mit 971 bis 988 aa.

Gschicht

Z Frankriich si d Bostläitzaale am 1. Januar 1965 iigfüert worde. Mä het drbii d Departemänt-Nummere brucht, wo scho lang in dr Verwaltig und in dr Organisazioon vom Bostdienst verwändet worde si und wo in e baar Fäll gänderet oder ergänzt worde si. Die franzöösische Bostläitzaale si zu dere Zit zwäistellig gsi, d Zaale vo 01 bis 95.^[1] Scho am 26. Oktober im gliiche Joor het d Bost- und Telegrafeverwaltig P. T. T. d Bostläitzaal ergänzt. Mä het vor em Ortsnaame d Nummere vom Departemänt gschriibe und denn die erste drei Buechstabe vom Ortsnaame in Groossbuechstaabe, zum Bischbil:

68 COLmar oder

13 MARseille.

S fümfstellige Zifferesüsteem vo hüte isch am 3. Juni 1972 iigfüert worde.