Die dorp is genoem na Hans Brits wat dr. David Livingstone op een van sy reise na die binneland vergesel het. Daarna het hy besluit om hom te vestig waar die dorp vandag staan. Die dorp is in 1877 gestig nadat 'n groep boere 'n deel van Brits se plaas Gemsbokfontein gekoop het vir dié doel en toestemming by die Ring van Beaufort gekry het om ’n NG gemeente te stig, wat op 25 Januarie1877 tot stand gekom het. 'n Dorpsraad het in 1890 die administrasie van die dorp by die Nederduitse Gereformeerde Kerk oorgeneem.
Ekonomie en kommunikasie
Die ekonomie van die dorp en distrik (7 000 km2) is hoofsaaklik op merinowol gegrond. Die N12 nasionale pad loop deur Britstown en verbind die dorp met Victoria-Wes en Strydenburg. Die N10 tussen De Aar en Prieska loop noord van Britstown verby. Nog 'n buurdorp, Vosburg, is 63 km oos van Britstown geleë.
Toerisme
'n Trein ry Britstown, onderweg na Prieska, binne.
Die Britstown-museum is geleë in die gebou in Raathstraat wat voorheen die Holy Trinity-kerk gehuisves het. Die mees imposante gebou op die dorp is waarskynlik die NG kerk, opgerig as ’n plek van aanbidding in Julie 1894 en vandag nog as sodanig in gebruik. Die gebou is in 1927, toe die gemeente 60 jaar oud was, verbeter en in 1949 opgeknap. Besoekers kan die omliggende Karoolandskap ervaar op talle voetslaanroetes op plase in die omgewing. Interessante argeologiese terreine sluit dié op die plaas Brakwater, Keurfontein, Maritzdam en Omdraaivlei in. Uitstappies om die helder sterre in die Karoohemel te aanskou kan gereël word.
Boorlinge van Britstown
Louis Luyt – Suid-Afrikaanse sakeman en sportadministrateur.
.svg)
