PROFILBARU.COM

Oh
Оха
Lidnanznam;	Flag;
Valdkund	Venäma
Eläjiden lugu (2023)	19,888 ristitud
Pind	20,98 km²
Pämez'	Jevgenii Mihlik; (sügüz'ku 2022—)
Telefonkod	+7−42 437-xx-xxx
Avtokod	65
Aigvö	UTC+11 (MSK+8)

Oh (ven.: Оха́) om Venäman lidn Sahalinan agjan Sahalin-saren pohjoižes. Se om agjan nellänz' lidn eläjiden lugun mödhe, Ohan lidnümbrikon administrativine keskuz.

Istorii

Vl 1880 pen' Ohe-žilo (ven.: Охэ) oli olmas kivivoin pindlöudmižsijanno. Ectihe enamba kivivoid, no satusetomašti, i tacihe žilod. Vl 1910 «Zotovan jäl'gnikad da kompanii» löuzi ezmäšt surt kivivoid, no se jäi kävutandata. Vll 1920−1925 Japonii okkupirui Sahalinad, i vl 1921 saihe ezmäšt kivivoid surel mülündal. Nügüdläižen eländpunktan aluz om pandud vl 1925, nimitihe jogen mödhe. Om lidnan statusanke vspäi 1938.

Vl 1942 saudihe «Oh — Komsomol'sk Amural»-kivivoinveimen. Vn 1995 (28. semendku, 7,2-ballaine) Neftegorskan manrehkaiduz mureni Ohan-ki sauvusid paloin. Vspäi 2005 ühtištadihe Ohan rajonad lidnanke, kätihe lidnümbrikoks. Om severz'-se vahtkundan žiloid lidnas ümbri.

Oh-lidn šingotase mehanižel i raudbetonan tegimil, kivivoin i londuseližen gazan samižen Ohotskan meren šel'faspäi äiluguižil projektoil, mugažo Ohan lämuzelektrokeskuz radab.

Geografijan andmused

Lidn sijadase ümbrikon pohjoižpäivnouzmas, Ohotskan meren Urkt-lahten-järven randal, 30 m ü.m.t. keskmäižel korktusel.

Matkad Suvisahalinskhasai om 740 km suvhe orhal vai 850 km avtotedme. Lähembaine raudtestancii sijadase Nogliki-žilos, 230 km suvhe avtotel. Lähembaine lidn om Nikolajevsk Amural (Habarovskan rand) 156 km päivlaskmha orhal. Vll 1999−2006 demontiruihe raudted Noglikišpäi.

Klimat om ven meren, om tazostadud Edahaižen Pohjoižen rajonha vilun Päivnouzmaižsahalinan merijoksmusen tagut. Voden keskmäine lämuz om −0,2 C°, heinkun-elokun +16,1..+16,7 C°, vilukun-uhokun −17,2..−17,9 C°. Il'man keskmäine vozne relätivine nepsuz om 71,7 %.

Tobmuz

Kaik kümne žilod mülüdas lidnümbrikho Ohan ližaks. Ühthemänho 26 eländpunktad om likvidiruidud NSTÜ:n olendan jäl'ghe. Lidnümbrikon pind — 14 815,87 km².

Lidnümbrikon pämez' om sen Administracijan pämez'. Edeližed Administracijan pämehed oma Jelena Kasjanova (sulaku 2021 — sügüz'ku 2022), Natal'ja Ričkova (kezaku 2020 — sulaku 2021), Sergei Gusev (keväz'ku 2017 — kezaku 2020). Lidnümbrikon Suiman ezimez' om Nikita Bibik vn 2023 redukuspäi. Edeližed suiman ezimehed oma Andrei Silenginskii (reduku 2018 — reduku 2023), Jevgenii Pereverzev (radoi vn 2018 redukuhusai).

Eläjad

Vn 2010 Venäman rahvahanlugemižen mödhe lidnan eläjiden lugu oli 23 008 ristitud, lidnümbrikon — 25 855 ristitud, vn 2021 lidnan — 20 357 ristitud. Vl 2018 kaik 20 715 ristitud elihe lidnas i 22 612 ristitud kaikes lidnümbrikos. Kaikiš suremb lidnan ristitišt oli 37 000 eläjad vl 1992.

Ortodoksižen hristanuskondan ph. Sergii Radonežalaižen kivine jumalanpert'^[1] om saudud vll 1995−2001.

Lapsiden opendusen aluzkundad oma seičeme nimitadud i nomeruidud päivkodid (nomer 1, 2, 5, 7, 8, 10, 20), augotižškol (nomer 2), koume keskškolad (nomer 1, 5, 7), škol nomer 4, lapsiden da norišton pert', kaks' čomamahtoiden školad (nomer 1 i 2), sportškol. Sahalinan industrialine tehnikum^[2] i Sahalinan valdkundaližen universitetan filial^[3] oma lidnan professionaližen opendusen aluzkundoikš.

Galerei

Lidnümbrikon administracijan sauvuz (2018)
Ph. Sergii Radonežalaižen jumalanpert' (huralpäi) i muštnik Neftegorskan pölištunuzile eläjile (oiktalpäi), vn 2018 nägu
Kivivoinčibun model' irdal (2018)
Keskškol nomer viž vl 2018
Lebusija lidnan röunal (2013)

Homaičendad

Irdkosketused

Oh (lidn) Vikiaitas

	Sahalinan agjan lidnad
	Aleksandrovsk Sahalinal \| Aniv \| Dolinsk \| Holmsk \| Korsakov \| Kuril'sk \| Makarov \| Nevel'sk \| Oh \| Poronaisk \| Severokuril'sk \| Suvisahalinsk \| Tomari \| Uglegorsk

[1] Ohan pühäpertid sobory.ru-saital. (ven.)

[2] Sahalinan industrialižen tehnikuman sait (licey6okha.ru). (ven.)

[3] Ohan filial Sahalinan valdkundaližen universitetan sakhgu.ru-saital. (ven.)

[1]

[2]

[3]