Novočeboksarsk

Novočeboksarsk
Новочебоксарск (ven.)
Ҫӗнӗ Шупашкар (čuv.)

Lidnanznam	Flag
Valdkund	Venäma
Eläjiden lugu (2022)	127,481 ristitud
Pind	51,14 km²
Pämez'	Aleksei Jermolaev (kül'mku 2020—)
Telefonkod	+7−8352-xxx-xxx
Avtokod	21, 121
Aigvö	UTC+3 (MSK+0)

Lidnan trolleibusan maršrutoiden shem (2022)

Novočeboksarsk (ven.: Новочебокса́рск, čuv.: Ҫӗнӗ Шупашкар) om Venäman lidn da lidnümbrik Čuvašijan Tazovaldkundan pohjoižes. Se om tazovaldkundan kahtenz' surtte lidn, Čeboksaran päivnouzmaine kaimdailidn.

Istorii

Nügüd'aigaižen eländpunktan aluz om pandud vl 1960 kuti Sputnik-žilo sauvomha himižkombinatad. Vl 1965 žilo sai lidnan statusad nügüdläiženke nimenke.

Novočeboksarskan ižandusen päsarakod oma himine tegimišt (AS «Himprom»), gidroenergetik (Čeboksaran GES), kivivoin ümbriradmine da sauvondmaterialiden pästand, mugažo omblendfabrik om olmas.

Geografijan andmused

Lidn sijadase Volgan oiktal randal (Čeboksaran vezivaradim), 90 m ü.m.t. keskmäižel korktusel. Reljef om vanoikaz, kukhikaz tazangišt. Matkad Čeboksaran röunhasai om kuz' kilometrad päivlaskmha, toižes keskusespäi toižhesai om 15 km.

Novočeboksarsk jagase koumeks administrativižeks rajonaks: Päivnouzmaine, Suvine da Päivlaskmaine. Alajagadas rajonid 18 lidnanlaptaks. Ol'deevo-külä (310 rist. vl 2017) mülüb lidnümbrikho Novočeboksarskan ližaks.

Eläjad

Vn 2010 kaiken Venäman rahvahanlugemižen mödhe eläjiden lugu lidnan oli 124 097 ristitud, lidnümbrikon — 124 392 ristitud. Lidnan ristitišt vajehtase 123..126 tuhad eläjid röunoiš vspäi 1995 (126 885 rist. vl 2009). Vl 2017 kaik 126 072 ristitud elihe lidnas i 126 382 ristitud kaikes lidnümbrikos. Kaikiš suremb lidnan ristitišt oli 127 586 eläjad vl 2021.

Rahvahad (enamba 0,6% vl 2010, ozutadud rahvahudenke): čuvašalaižed — 50,0%, venälaižed — 38,7%, totarlaižed — 1,3%, marilaižed — 0,8%, mordvinalaižed — 0,6%, toižed rahvahad — 8,6%.

Ortodoksižen hristanuskondan viž pühäpertid^[1] oma avaitud lidnas: Ph. Vladimir I Kijevalaine-ruhtinasen päjumalanpert' (om letud vll 1990−2000), kaks' jumalanpertid i kaks' časounäd. Islaman üks'jäine pühäpert' om saudud lidnas.

Koume sijališt specialižen keskopendusen aluzkundad ratas lidnas: himiž-mehanine^[2] i politehnine^[3] tehnikumad, olimpižen rezervan škol.

Edeline lidnan pämez' (Deputatoiden suiman ezimez') om Oleg Matvejev (reduku 2010 — reduku 2020). Lidnan Administracijan pämez' om Dmitrii Pulatov vn 2021 kezakuspäi.

Transport

Avtobusad, trolleibusad da maršruttaksid oma kundaližeks transportaks.

Ühtennimine raudtestancii kävutase vaiše jüguiden täht raudtel Čeboksaraspäi.

Galerei

• 
  Ph. Vladimir I Kijevalaine-ruhtinasen päjumalanpert' (ortodoksine hristanuskond), vn 2010 nägu
• 
  Čeboksaran GES vl 2008
• 
  «GESstroi»-bizneskeskuz (2010, ende betonan tehmižen kompanii)
• 
  «Atal»-kinoteatr i bobuštuzkeskuz (2010)
• 
  Keskuzstadion A.G. Nikolajevan nimed (2008)
• 
  «Sportivnaja»-adivpert' i sportkompleks vl 2008 (Sportivine)
• 
  Lidnan jogiport jüguiden täht vl 2009

Homaičendad

1. Novočeboksarskan pühäpertid sobory.ru-saital. (ven.)
2. Novočeboksarskan himiž-mehanižen tehnikuman sait (чхмт.рф). (ven.)
3. Novočeboksarskan politehnižen tehnikuman sait (npth.ru). (ven.)

Irdkosketused

• Novočeboksarsk-lidnan Deputatoiden suiman sait (ngcd.cap.ru). (ven.) (+ äikel'ne avtomatine känduz)
• Novočeboksarsk-lidnan tobmuden sait (nowch.cap.ru). (ven.)

	Čuvašijan Tazovaldkundan lidnad
	Alatir' | Civil'sk | Čeboksarad | Jadrin | Kanaš | Kozlovk | Mariinskii Posad | Novočeboksarsk | Šumerl'