El servo de Dio Pagoło VI, nato Giovanni Battista Enrico Antonio Maria Montini (Concesio, 26 de setenbre 1897 - Castel Gandolfo, 6 de agosto 1978), el xe sta papa dal 1963 al 1978.
Biografia
Giovanni Battista Montini el xe nato el 26 de setenbre 1897 a Concesio, da na fameja borghexe de sołide raixe catołeghe.
Inte el 1903 el xe sta iscrito come studente esterno inte el cołejo Cesare Arici de Bresia, direto dai gesuiti.
Inte el 1907 el va a Roma par ła prima volta, dove el va in udiensa co ła fameja dal Papa Pio X.
El 29 de majo del 1920 el xe sta ordinà prete inte ła catedrałe de Bresia. Ntel novenbre del steso ano el se trasferise a Roma inte el Seminario Lonbardo e l'ano dopo inte ła Pontificia Accademia dei Nobili Ecclesiastici par ła preparasion al servisio diplomatego de ła Santa Sede. Tra el 1922 e el 1924 el otien diverse lauree: in fiłoxofia, dirito canonico e dirito siviłe. Ntel 1925 el xe nominà asistente eclexiastego nasionałe de ła FUCI.
Cołaborasion co Pio XI e Pio XII
Inte el 1931 el vien incaricà de na mision in Germania e Svisera par organixar ła difuxione de l'enciclica No gavemo bisogno inte ła cuałe el Papa Pio XI el condanava el regime fasista par ło sioglimento de łe organizasion catoleghe. Inte el 1933 el xe costreto a dimatarse da ła FUCI par l'opoxision de corenti clericałi contrarie a ła so formasion culturałe.
El 13 de diçenbre 1937 el xe nominà sostituto de ła Segreteria de Stato e cołabora stretamente col cardinałe segretario de Stato Eugenio Pacelli. El 10 de febraro 1939 el xe el primo a esare ciamà davanti al łeto del Papa Pio XI ca zera drio morire. Poche setimane dopo el cołabora a ła stexura del radiomesajo del neo-ełeto Papa Pio XII del 24 de agosto contro ła guera; soe łe storeghe parołe:
(VEC)
«
Gnente a xe perso co ła pace! Tuto a poe esarlo co ła guera»
.
Ała fin de ła Seconda Guera Mondiałe Montini el organisa el mondo catołego inte ło scontro co ła difuxion de łe idee marxiste; ma in modo manco agressivo rispeto a tanti altri esponenti. Questo forse a ghe ga costà ła cariera in quanto no el zera ben visto dai pì conservatori.
Arcivescovo de Miłàn
El 1° de novenbre 1954, dopo ła morte de Alfredo Ildefonso Schuster, el xe sta nominà arcivescovo de Miłàn, sensa esare fato cardinałe, e a tanti questo el xe paresto come ałontanamento da ła Curia romana.
Ła nomina a cardinałe e l'ełesion
Ała morte de Pio XII, el conclave el ga ełeto papa, el 28 de otobre 1958, el vecio Patriarca de Venesia, Angelo Giuseppe Roncalli, che el gaveva grande stima de Montini tanto che el ga scuminsià a mandarlo in tante parte del mondo a rapresentare el Papa. El xe sta subito fato cardinałe inte el Concistoro del 15 de diçenbre 1958, dal novo Papa.
El curto ma intenso pontificato de Giovani XXIII el ga visto Montini ativamente coinvolto, sora-de-tuto inte i inpegni rełativi al Concilio Vaticano II, scuminsià inte l'otobre 1962. El Concilio el se fermà el 3 de zugno 1963 par ła morte de Papa Roncalli, malà da qualche mexe.
El curto conclave sucesivo el xe finio co l'ełesion de Montini, ca el se ga meso el nome de Pagoło VI, el 21 de zugno 1963.
El Pontificado
Da Papa el ga portà a ła fin el Concilio.
El si ga catà inte on periodo de forti scontri połiteghi e sociałi, mentre ła società civiłe ła se desacrałisava progresivamente, come a testimonia i referendum sol divorsio e so l'abordo.
Inte el 1966 el fa abołìo, dopo quatro secołi, l'indice dei livri proibìi.
.svg)
