Basan (nome ufisial in italian Bassano del Grappa) el xe un comun de 43.709 abitanti de ła provincia de Vicensa.
A nord el ga el Mónte Grapa e el confina co i paixi de ła Valbrenta, mentre a nordest el confina col comun de Roman, a est co Casoła, a sud col comun de Roxà, a sudòvest co Cartijan e Łe Nóve a òvest co Maròstega. Ła frasion de montagna Rubio de Basan ła confina co ła frasion Rubio de Conco: insieme łe fa praticamente un paexeto ugnło, che sta par conto suo, ciamà apunto Rubio.
Zeografia
Basàn se trova su de na conoide formà da ła Brenta, al sboco del Canałe de ła Brenta e ai pie de l'Altipian de Axiago e del Monte Grapa. Ła Brenta ła divide Basàn in do parte: cueła est (Sanca Brenta) almanco tre volte pi sviłupà de cueła ovest (Drita Brenta).
Ł'area urbana de Basàn ła se estende ben oltre i confini comunałi: ła conprende i comuni de Pove del Grapa, Sołagna, Canpołongo sol Brenta, Cartijan, Łe Nóve, e i abitai de San Giusepe e San Zeno del comune de Casoła, Roman Alto, San Giacomo e Fełette del comun de Roman, ła frasion Travetore del comune de Roxà. L'àrea urbana de ła sità de Basàn ła ga na popołasion de sirca 65.000 abitanti.
