జాను ఒక తెలుగు ప్రేమ కథా చిత్రం. ఇది తమిళంలో వచ్చిన '96 చిత్రానికి రీమేక్. మాతృకను తెరకెక్కించిన దర్శకుడు సి. ప్రేమ్ కుమారే తెలుగులోనూ దర్శకత్వం వహించారు. దిల్ రాజు "శ్రీ వేంకటేశ్వర క్రియేషన్స్ బ్యానర్" పై నిర్మించిన ఈ చిత్రంలో శర్వానంద్, సమంత కథానాయకానాయికలుగా నటించారు. గోవింద్ వసంత సంగీతం అందించిన ఈ చిత్రాన్ని 2020 ఫిబ్రవరి 7న ప్రపంచవ్యాప్తంగా విడుదల చేశారు. శర్వానంద్, సమంతల నటన ఆకట్టుకోవడంతో ఈ చిత్రం ప్రేక్షకుల వద్ద మంచి ప్రశంసలు పొందింది. [2]
రీమేక్ చిత్రం
తమిళ సంచలనం సృష్టించిన క్లాసిక్‌ సినిమా ‘96’. ఈ సినిమా మంచి విజయాన్ని సొంతం చేసుకోవటంతో కన్నడలో ‘99’గా రీమేక్ అయింది. దీంతో నిర్మాత దిల్ రాజు ఈ సినిమాను తెలుగలో రీమేక్ చేయాలనుకున్నారు.[3]
కథ
కే.రామచంద్రన్‌ (శర్వానంద్) ట్రావెల్‌ ఫొటోగ్రాఫర్‌. ఓ జర్నీలో చిన్నప్పుడు తను పుట్టి పెరిగిన ఊరికి వెళతాడు. అక్కడ ఒక్కొక్కటిగా చిన్ననాటి జ్ఞాపకాలను గుర్తుకు తెచ్చుకుంటాడు. అలా తను చదువుకున్న స్కూల్‌ దగ్గరకు చేరుకుంటాడు. ఆ సమయంలోనే తొలిప్రేమ జ్ఞాపకాలు అతడి కళ్లముందు మెదులుతాయి. జానకీ దేవీ (సమంత)తో ప్రేమలో పడటం.ఆమెతో గడిపిన మధుర క్షణాలు.విడిపోవటం! అన్నీ గుర్తుకు వస్తాయి. ఆ తర్వాత చోటుచేసుకునే కొన్ని పరిణామాలతో దాదాపు 17 సంవత్సరాల తర్వాత స్కూల్‌ ఫ్రెండ్స్‌ ఏర్పాటు చేసిన గెట్‌ టు గెదర్‌ పార్టీలో ఇద్దరూ కలుస్తారు. ఇంతకీ ఆ ఇద్దరు ఎందుకు విడిపోయారు? సుదీర్ఘకాలం తర్వాత కలుసుకున్న ఓ ప్రేమ జంట మదిలో మెదిలే భావాలేంటి? అన్నదే మిగతా కథ.[4]
