కృష్ణుడు ఒక తెలుగు సినీ నటుడు. తన భారీ కాయంతో తనదైన ప్రత్యేక శైలి నటనను సృష్టించుకున్నాడు.
నేపథ్యం
ఇతని అసలు పేరు అల్లూరి కృష్ణంరాజు.తూర్పు గోదావరి జిల్లా, రాజోలు తాలూకా, చింతలపల్లి ఇతడి స్వగ్రామము. ఇతడు విజయనగరంలో జన్మించాడు. వీళ్ళ నాన్నగారి పేరు అల్లూరి సీతారామరాజు. అమ్మ సావిత్రీదేవి. నాలుగో తరగతి వరకు నిడదవోలులో, తొమ్మిది వరకు విశాఖపట్నంలో, పదో తరగతి కాకినాడలో చదివాడు. బెంగళూరులో పాలిటెక్నిక్‌ కోర్సు, ఆటోమొబైల్‌లో డిప్లొమా చేశాడు.[1]
నటనా నేపథ్యం
1997లో హైదరాబాదు చేరుకుని కమలాపూర్‌ కాలనీలో ఉన్న దేవదాస్ కనకాలగారి ఫిలిమ్‌ ఇనిస్టిట్యూట్‌లో చేరాడు. రాజీవ్ కనకాల కూడా అప్పుడప్పుడు వీరికి క్లాసులు చెప్పేవారు. వారి అమ్మ లక్ష్మీదేవి కనకాల రెగ్యులర్‌గా క్లాసులు చెప్పేవారు. 1998లో ఈ కోర్సు పూర్తిచేశాడు. ఇతడితోపాటు శ్రీవాస్తవ్‌ కూడా దర్శకత్వంలో శిక్షణ పూర్తిచేసి ఎన్నో చిత్రాలకు సహాయ దర్శకుడిగా పనిచేస్తున్నాడు. శిక్షణ పూర్తయి అవకాశాలు వస్తున్న సమయంలో ఇతడి స్కూటర్‌ని లారీ డీకొట్టి పెద్ద రోడ్డు ప్రమాదానికి గురయ్యాడు. ఎముక విరగడంతో రాజోలు సమీపంలోని వీరి సొంతూరు చింతలపల్లి వెళ్లిపోయాడు. నటీమణి హేమ కూడా రాజోలు నివాసే. వారి సహకారం ఇతడికి బాగా లభించింది.
