Lo Tambora es un volcan actiu de tipe explosiu situat sus l'illa Sumbawa, una de las Illas Pichonas de la Sonda en Indonesia. Es de tipe estratovolcan, mesura 60 quilòmetres de diamètre, atenh una altitud de 2.722 mètres e son cràter caldera fa 8 quilòmetres de diamètre e 1 quilòmetre de prigondor.
Son erupcion de 1815 es la pus murtrièra de l'Istòria umana.
Erupcion del Tambora
Vista satellita de Tambora.
L'erupcion del volcan tuèt aperaquí 92000 personas. Es considerada coma l'erupcion mai violenta dels tempses istorics, amb la del volcan de l'anciana illa de Santorin, situada en Grècia, en 1610 abans Jèsus Crist, e la del volcan Taupo, situat en Nòva Zelanda, en 230.
L'erupcion del Tambora aguèt una poissença surpassant de detz mila còps las de las bombas A d'Hiroshima e de Nagasaki reünidas en 1945. Las explosions del volcan foguèron entendudas a mai de 1 400 km de distància. De tsunamis s'abatèron sus las illas a mantunas centenas de quilomètres de distància.
L'erupcion aguèt d'importantas consequéncias climaticas globalas. Foguèt a l'origina de l'an sens estiu de 1816, qu'entrainèt una famina que faguèt mai de 200 000 victimas. Tota la còsta Èst dels Estats Units foguèt tocada ; nevèt en junh dins lo Maine. Lo glaç foguèt observat suls lacs en plen estiu en Pensilvània. Las recòltas foguèron destruitas abans d'arribar a maturitat, especialament en Massachusetts e Nòva Jersei. En China, las recòltas de ris foguèron calamitosas en rason del freg. De casudas de nèu se son produitas en plen estiu. L'Euròpa foguèt tanben sevèrament impactada[1].
