Jens Gran (8. oktober 1794–23. januar 1881) var ein norsk kjøpmann og stortingsmann frå Bergen.
Gran var son til ein kjøpmann og skipsreiar. Frå 1810 var han tilsett i faren si forretning, tre år seinare tok han sjølv borgarskap i Bergen. Åra 1814-16 tok han merkantil utdanning utanlands, særleg i Frankrike, eit land han seinare besøkte ofte. Sidan var han sjef i Jens Gran & Søn til han døydde.
I 1837 vart Gran medlem av det aller fyrste bystyret i Bergen, eit ombod han hadde til tidleg i 1850-åra då han flytta til Kalfaret, som den gongen låg utanfor bygrensa. Han var medlem av forlikskommisjonen i åtte år.
Gran representerte Bergen på Stortinget i 1839, 1845 og 1848. I 1839 var han medlem av tollkomiteen, seks år seinare var han sekretær i same komiteen, medan han i 1848 var vanleg medlem att. På 1848-tinget var han elles medlem av komiteen om statslån og om krigen i Danmark.
I 1845 var Gran medlem av ein kongeleg kommisjon om tollova, og i 1848 om statslånet.
Kjelder
