Kart over nedbørsområde og elver i USA. Grensene mellom nedbørsområde, dei såkalla «continental divides», er markert med raud strek.
Elver i USA er ei liste over større elver i USA, inklusive elver som kryssar eller tangerer grensa til Canada, ordna etter kva for eit nedbørsområde dei tilhøyrer og etter lengd. Her er elver med lengder på over 500 km medrekna. Dette omfattar storparten av alle større vassdrag i landet.
Elvene i USA omfattar nokre av dei lengste vassdraga i verda. Den geologiske historia til landet har skapt eit stort mangfald av landskaps- og elvetypar. Det geologiske stabile sentralområdet vert dominert heilt av Mississippibekkenet, som med nedbørsfeltet sitt på 3,2 millionar km² drenerer ein tredel av arealet i landet. Tek ein med elvene som renn ut i Mexicogolfen, inklusive elvene i Texas, utgjer dette sørvendte nedbørsområdet meir enn halve arealet til USA. Bekkenet er flatt og prega av lausmassar som er lagt opp og vaska ut av elvene, fallhøgda er låg og gjev lite potensial for vasskraft.
På austkysten vert landskapet prega av den kaledonske fjellkjedefoldinga, der det laurentiske kontinentet støytte saman med dagens Nord-Europa og skapte tette foldestrukturar som går frå sørvest til nordaust. Foldinga styrer retninga til elveløpa, og elvene er korte. I nordaust utgjer St. Lawrence-bekkenet eit unntak frå dei geologiske hovudmønstra. Dette austgåande vassdraget oppstod då enorme mengder smeltevatn i Lake Agassiz braut igjennom dei smeltande ismassene under yngre dryas for snart 13 000 år sidan, og grov seg ut til Nord-Atlanteren. Forutan å kjøla ned klimaet i verda og forstyrra Golfstraumen, skapte hendinga St. Lawrence-elva med eit av verdas yngste, men stabile nedbørsområde på dryge 1 million km².
I vest ligg eit av dei største høglanda i verda mellom Rocky Mountains og Sierra Nevada, med rom for lange, men ganske vassfattige elver med store nedbørfelt. Dei store høgdeskilnadene skapar her store potensiale for vasskraft, som ein ikkje ser andre stadar i landet. Dei nordgåande elvene til Hudsonbukta ligg i det alt vesentlege på canadisk side av grensa.
Elver ordna etter nedbørsområde
Nedbørsfeltet til Colorado-elva.Nedbørsfeltet til Yukon-elva.Nedbørsfeltet til Columbia-elva.St. Lawrence-bekkenetMississippibekkenet er det største nedbørsområdet i USANedbørsfeltet til Rio Grande.
Elvene vert oppgjevne frå Californiabukta i sørvest og deretter med klokka til Mexicobukta i søraust. Mississippi-Missouri vert her rekna som éi elv, men elvene Mississippi og Missouri er òg inkludert i lista. Sideelver til canadiske elver som munnar ut i Canada, står i kursiv. Viktige elver som i denne lista òg har oppgjeve ei eller fleire underordna sideelver, står i feite typar.
Lista nedanfor oppgjev alle vassdrag og sideelver i USA med leng på over 500 km. Elvene er rangerte i USA («Rang nasj») og globalt («Rang glob») mælt etter lengd (km), og har med nedbørsområdet til vassdraget (km²). Mississippi-Missouri vert her rekna som éi elv som er rangert globalt. Elvene Mississippi og Missouri er òg inkludert i lista og gjeven sjølvstendig rangering nasjonalt. Desse to elvene er dessutan oppgjevne med den globale rangeringa dei ville hatt dersom dei vart mælt kvar for seg. Det same gjeld Alabama-Coosa, Kansas-Republican, og North/South Platte, som har oppgjeve teoretisk global rangering i kursiv, medan kvar enkelt sideelv òg er oppgjeven og rangert.
Med nedbørsfelt meiner ein det arealet som vert drenert (nedbørsområdet) av elva inklusive bielver. Hovudelver står oppført i feite typar, medan sideelver står oppført i kursiv. Lengd angjev normalt total lengd av vassdraget, men mange av vassdraga er samansett av ulike elver der hovudelva tidvis berre utgjer ein (nedste) del av heile elveløpet – her er desse då oppgitt med lengda av heile vassdraget.
