«Eat Your Salad» ([norsk omsetjing] 'et salaten din') er ein latvisk elektropopsong med innslag av hiphop og funk frå 2022 med det latviske bandet Citi Zēni. Bandet har skrive songen sjølv, og songen vart gjeven ut 13. januar 2022. «Eat Your Salad» vann den latviske songtevlinga Supernova 2022 og var det latviske bidrag i Eurovision Song Contest 2022 i Torino i Italia.
Om songen
«Eat Your Salad» er ei hylling til kjøtfritt kosthald og økovennleg livsstil. Bandet skreiv songen for å «gjere eit vanskeleg tema enklare å fordøye og morosamt å lytte til».[1] Songen legg vekt på at det er «sexy å vere grøn», og teksta tek for seg det bandet sjølv gjer for å redusere sitt økologiske fotavtrykk på miljøet.[2]
«Eat Your Salad» inneheld ei rekkje seksuelle referansar, og opningslinja går: «Instead of meat, I eat veggies and pussy» (norsk 'i staden for kjøt, et eg grønsakar og fitte'). Men banning og grove ord er ikkje tillatne i Eurovision Song Contest,[3] og under framsyninga i den latviske finalen, og i Eurovision, hoppa bandet over ordet «pussy».[4]
Supernova og Eurovision Song Contest
Gruppa sende inn «Eat Your Salad» til den latviske songtavlinga Supernova 2022 i regi av LTV. Vinnaren av tevlinga fekk representere Latvia i Eurovision Song Contest 2022.
Kringkasteren kunngjorde 5. januar 2022 at «Eat Your Salad» var blant bidraga i Supernova 2022.[5] Songen tok seg vidare frå semifinalen 5. februar og vann til slutt finalen 12. februar etter å ha vore favoritt hos både juryen og sjåarane.[6] Songen vart dimed det latviske bidraget til Eurovision Song Contest 2022. Songen vart nummer 14 av 17 i den fyrste semifinalen, og han kvalifiserte seg dimed ikkje til finalen.[7]
Allereie før den latviske finalen vart songen ein viral hit[8], og den låg på viral-topplister på Spotify i fleire land, blant anna i Noreg.[9]
Listeplasseringar
Kjelder
