De Texelaar oder dat Texelschaap is en Schaap, dat toeerst up de nedderlannsche Insel Texel tohuse weer. In de tweete Hälft vun dat 19. Johrhunnert sünd avers allerhand engelsche Rassen inkrüüzt wurrn. Dor güng dat dor üm bi, dat de Produktschoon vun Fleesch un Wull verbetert weern schull. Inkrüüzt wurrn sünd besunners Lincolnschaap, Leicesterschaap un Wensleydaleschaap. Amenne is en stebige Raas mit wunnerbore Egenschoppen dor bi rutkamen.
Wo dat Schaap utsütt
Dat Texelschaap is tämlich stebig boot un hett en bredern Kopp, as dat Swifterschaap. Höörn kaamt bi düsse Raass nich vör. De Kopp hett fiene witte Haare. Dat Schaap hett starke Lennen un runde, vulle Schinkens. De Wull wasst över dat ganze Lief hen bit an de Kehl. De Vörpoten mütt fix wullen ween, tominnsten bit ünner dat Knee. Just so de Achterpoten. Ok dor schall de Wull tominnst bit in de Midden vun den Unnerschenkel recken. Ok de Steert is wullen, man bi Aulämmer warrt de faken kort na de Geboort kupeert. De Grund is, dat de Steert nich in'n Weg stahn schall, wenn dat Schaap süms Lämmer kriegen deit.
Wat besunners is
De Texelschaap bruukt bi dat Lammen de Hölp vun den Schaaphöller oder vun en Veehdokter. De Auschaap könnt 70-80 kg swaar weern bi en Schufthööcht vun bi 68 cm. De Bück könnt ok 90 kg wegen bi en Schufthööcht vun 70 cm. Eenmol in't Johr in'n Vörsummer weert de Schaap scharen. Jedet Schaap bringt bi 4-5 kg Wull.
Lämmer
In'n Dörsnitt smiet de Auschaap twee Lämmer, wenn dat sowiet is, man bloß een mol in't Johr. De beste Tiet to'n Lammen is ganz fröh in dat Vörjohr, man dat kümmt ok mol en Lamm vör, wat al vör Wiehnachten boren is. Dat en oder anner Auschaap smitt woll ok veer oder fiev Lämmer. De Lämmer weegt bi 4-5 kg. De Dracht duert bi 5 Maanden.
Wo dat Texelschaap vörkummt
De meisten Schaap in de Nedderlannen sünd Texelschaap. Dor loopt se faken langs de Dieken. Ok up de Insel Pellworm in Noordfreesland is dat Texelschaap tohuse.
