Tarjei Bø

Tarjei Bø (2010)

Tarjei Bø (* 29. Juli 1988 in Stryn) is en norweegsch Biathlet. He is sowohl Olympiasieger as ok mehrfack Weltmeester. In de Saison 2010/11 steeg he as jüngst Weltcup-Gesamtsieger to de besten vun de Welt up.

Werdegang

Tarjei Bø sien Vereen is Markane IL an, wo he vun Kjetil Sæter traineert wurrd. Siet eenig Johren leevt un traineert he in Lillehammer. He is de öllere Bröer vun den in de glieker Sportaart aktiven Johannes Thingnes Bø.

Eerste Erfolge

Bi sien eerst Junioren-Weltmeesterschap 2006 in Presque Isle wunn he den Titel in'T Eenzel, keem in de Verfolgung up Platz 2 un verpass in' Sprint un in dat Staffelrennen as Veert blots knapp en Medaille. 2007 wunn Bø bi de Junioren-WM in Martell twee wiedere Medaillen. In' Eenzel as Veert un in' Sprint as Fievtplatzeerter verpass he de Medaillen knapp, in dat Verfolgungsrennen wurr he achter den Düütschen Florian Graf Tweet, ebenso mit Espen Årvaag un Magnus L‘Abeé-Lund in dat Staffelrennen achter dat Team ut Öösterriek.

All in jung Johren muss Bø eenig Rückslääg verkraften. Nah de Saison 2006/2007 wurr he krank un kunn en paar Maand meest nich traineeren, so dat he nich för de Junioren-WM 2008 nomineert wurr. Unverwacht keem dorher de fievte Platz bi de Norweegsch Meesterschapen vun de Senioren, ofschons he sück vörher den recht Arm utkugelt harr. In dat Fröhjohr 2008 hett sück Bø de Mandeln rutnehmen laaten. Dornah sünd aber langandüern Blööden uptreeden, de eerst in' Harvst endgültig stoppt wurrn kunnen.

Nah een Johr ahn Junioren-WM is de jung Norweger 2009 in Canmore to'n darten Mal antreeden. Dor leep dat in' Eenzel up Platz 23 un mit de Staffel up Platz 6 weniger good. In' Sprint un in de Verfolgung reck Bø denn aber doch jewiels de Bronzemedaille. Bedüüdend spoodriker verleepen de Biathlon-Europameesterschapen 2009 in Ufa. In Eenzel, Sprint un Verfolgung is he in de Junioren-Wettkämpe antreeden un wunn all dree Rennen. För dat Staffelrennen wurr he in de norweegsch Mannschap vun de Mannlüüd beropen. Hier wunn he gemeensam mit Dag Erik Kokkin, Henrik L’Abée-Lund un Rune Brattsveen ok den Titel. As Lohn för sien good Leistungen wurr Bø för dat Saisonfinale vun den Biathlon-Weltcup in Chanty-Mansijsk beropen. In Sprint keem he dorbi up Platz 61 un verpass dormit dat folgen Verfolgungsrennen um een Platz. Een Week later wurr he in dat Eenzelrennen norweegsch Meester un kunn dormit Emil Hegle Svendsen, up den tweeten Platz verwiesen. In dat Verfolgungsrennen wurr he Viezmeester un kunn dorbi ünner annern Ole Einar Bjørndalen achter sück laaten.

Fastsetten un Gesamtsieg in' Weltcup

In Pokljuka wunn Bø in de Saison 2009/2010 as 37. in en Eenzel eerstmals Weltcuppunkte. Bi den denn folgen Sprint reck he mit Platz 4 sien eerst Top-Ten-Platzeeren un verpass blots um 0,3 Sekunn den Platz up dat Podest. Bi dat eerst Weltcuprennen 2010 wunn he mit de Staffel vun Norwegen eerstmals in' Weltcup. Nah de fröh Erfolgen in de Saison 2009/10 stunn Bø all fröh as Deelnehmer an de Olympisch Winterspelen 2010 in Vancouver fast. Dorbi sett he sück etwa tegen de norweegsch Biathlon-Legende Frode Andresen dör. Bi de Spelen leep Bø dat Eenzel, in dat he 21. wur. Buterdem bill he mit Halvard Hanevold, Emil Hegle Svendsen un Ole Einar Bjørndalen de norweegsch Staffel, de düütlich vör de Mannschap ut Öösterriek den Olympiasieg recken dee.

To de Saison 2010/2011 kunn Bø mit twee veerten un en fievten Platz in Östersund sien Talent weer ünner Bewies stellen un reck een Week later in‘ Sprint in Hochfilzen sien eersten Weltcupsieg, de he bi dat ansluuten Verfolgungsrennen nochmal recken dee. Um Wiehnachten rüm gung hüm dat gesundheitlich nich so good, wunn aber in dat nee Johr in Oberhof Sprint un Massenstart un övernehm dormit de Führung in den Gesamtweltcup. To’n Uptakt vun de Biathlon-Weltmeesterschapen 2011 wunn he mit de norweegsch Mixed-Staffel de Goldmedaille. Dorbi övernehm he as Slusslöper up Platz 2 liggend, sien Mannschap nah da teerst Scheeten up Platz 1 un kunn den Vörsprung bit in dat Teel up 22 Sekunnen tegenöver den Düütschen Michael Greis utbauen. Sowohl in dat Sprintrennen as ok in dat dorup folgen Verfolgungsrennen wunn he de Bronzemedaille. In dat Eenzelrennen wunn he denn sien eerst Eenzel-Goldmedaille (vör Maxim Maximow un Christoph Sumann). Bø wunn todem mit sien en Teamkollegen Bjørndalen, Alexander Os un Svendsen de Staffel un weer dormit de spoodriekst Deelnehmer vun de Mannlüüd bi disse WM. An dat Enn‘ vun de Saison wunn he ok noch den Gesamtweltcup un wurr dormit to den jüngsten Gesamtweltcup-Sieger vun de Mannlüüd in de Biathlongeschichte. Bø wurr an‘ 8. Januar 2011 up de norweegsch Sportsgala as Newcomer vun dat Johr uttekent.^[1]

Krankheit un Rückkehr in de Weltspitze

In de dorup folgen Saison kunn Bø nah sien Sieg in Hochfilzen weer dat Geel Trikot vun den Gesamtweltcup-Führenden övernehmen, muss dat aber wegen längere Krankheitsphasen un dordör bedingt folgend middelmaatig Platzeeren ok weer afgeven. O bi de Biathlon-Weltmeesterschapen 2012 kunn he sien Erfolge vun dat Vörjohr nich noch mal schaffen, wunn aber mit de norweegsch Staffel sien veerten WM-Titel.

In de Saison 2012/13 kunn Bø nah lang gesundheitlichen Problemen eerst af Januar an‘ Weltcup deelnehmen.^[2] So steeg he in Oberhof in de Saison in un wurrr 25. In‘ Sprint und 22. in de ansluuten Verfolgung. Mit sien Platz 7 in dat Sprintrennen vun Ruhpolding qualifizeer sück Bø sluutend för de Biathlon-Weltmeesterschapen 2013 in Nové Město na Moravě. Den Weltcup in Antholz leet Bø durophen ut, um sück up de WM vörtobereiten. Bi de WM wurr Bø in den eersten Wettbewarf, de Mixed-Staffel, tosommen mit Tora Berger, Synnøve Solemdal un sien Früend Svendsen weer Weltmeester. Wiederhen wunn he mit de Staffel in de Besetten Bjørndalen, L’Abée-Lund, Bø un Svendsen sien nächsten WM-Titel. In dat letzt Rennen bis disse Veranstaltung, den Massenstart, mell sück Tarjei Bø denn weer endgültig in de Weltspitze torüch.^[3] So wunn Bø mit en fehlerfree Scheeten sien darte Goldmedaille bi disse WM un wurr achter sien Landslüüd Berger un Svendsen de dart spoodriekst Athlet. Bi den dorup folgen Weltcup in Oslo kunn Bø sien good Form ünnerstrieken. Dor wun he dat Sprintrennen un keem in de Verfolgung up den tweeten Platz. To’n Saison-Afsluss stunn he up Platz 15 vun den Gesamtweltcup.

Nix wunnen in Sotschi 2014

Ok de Weltcup-Saison 2013/2014 verleep nich so as plaant. Nahdem he sück all fröh in de Saison för de Olympisch Spelen qualifizeert harr, muss he weer krankheitsbedingt up eenige Weltcups verzichten. Ok bi de Olympisch Spelen, den ditjohrigen Saisonhööchtpunkt, gelung hüm kien good Ergevnis. In‘ Sprint keem he blots up Platz 39, in de Verfolgung kunn he sück up Rang 27 verbetern. Platz 26 in dat Eenzelrennen över 20 Kilometer bleev dorbi sien best Eenzelergevnis. Wiel he in de eerstmals bi disse Spelen utdragen Mixed-Staffel, de in de Besetten Berger, Tiril Eckhoff, Svendsen un Bjørndalen Gold wunn, nich to’n Insatz keem un ok de Staffelsieg mit de Mannlüüd verpass wurr, kreeg he in disse Saison kien Medaille bi Grootereignisse. In den Gesamtweltcup belegg he an‘ Enn‘ den Rang 29.

Medaillensammler in Kontiolahti 2015

To Anfang vun de Weltcup-Saison 2014/2015 seech dat so ut, as of sück de letzte Saison wedderhalen würr. Nah ehrder dörsnittlich Ergevnissen, aber en weer fröh in de Tiet schafft Qualifikatschoon för de Weltmeesterschapen in dat finnisch Kontiolahti, verpass Bø wegen Krankheit all Weltcup-Rennen in Oberhof un Ruhpolding un ok an‘ Holmenkollen keem he deswegen nich to’n Insatz. Dorum gull he bi de Weltmeesterschapen ok nich to den Favoritenkreis. Glieks bi dat eerst Rennen bi disse WM, de Mixed-Staffel, wunn he tosommen mit sien Bröer Johannes as ok Fanny Horn un Tiril Eckhoff de Bronzemedaille. In den 10-km-Sprint, in de Johannes Weltmeester wurr, schaff Tarjei as Dartplatzeert den Sprung up dat Podest. Dormit stunnen överhoopt to’n eersten Mal bi Biathlon-Weltmeesterschapen twee Bröers gemeensam up dat Podest. Wegen völ Scheetfehler harr Johannes in de Verfolgung kien Chance, aber Tarjei reck ok hier de Bronzemedaille (achter Erik Lesser un Anton Schipulin). In’t Eenzel keem he denn blots up Platz 25, wunn denn aber mit de norweegsch Staffel vun de Mannlüüd mit Ole Einar Bjørndalen, sien Bröer Johannes as ok Emil Hegle Svendsen achter de düütsch Staffel de Sülvermedaille. In‘ Massenstart is Tarjei Bø as Titelverteidiger antreeden un reck weer mit eeen Scheetfehler de veerte Bronzemedaille. Dormit harr he 5 vun söss mögelk Medaillen wunnen, mehr Eddelmetall wunn bi de WM nümms.

Saison 2015/16

In disse Saison harr he mal nich so völ mit Krankheiten und Besehren to kämpen und hett blots twee Starts utlaaten. Sien best Platzeeren weer dorbi Platz 2 bi en Sprint in Ruhpolding achter sien Bröer un vör Emil Hegle Svendsen. Dorto reck he noch dree Podestplätze. An dat Enn‘ vun de Saison stunn he up Platz 6 in den Gesamtweltcup un in den Verfolgungsweltcup reck he sogor Platz 4. Bi de Biathlon-Weltmeesterschapen 2016 to Huus in Oslo keem he in den Massenstart as best Ergevnis up Rang 6, wunn aber mit de Staffel de Goldmedaille un mit de Mixed-Staffel de Bronzemedaille.

Weblenken

• Tarje Bø in de Datenbank vun de IBU (engelsch)
• Tarje Bø in de Datenbank vun de FIS (engelsch)

Enkeld Nahwiesen

1. Hushovd tok storeslem under Idrettsgallaen (norweegsch, afropen an‘ 9. Januar 2011)
2. Bö: Keine Weltcuprennen 2012 Sport1.de, 1. November 2012, afropen an‘ 5. Januar 2013
3. Massenstart up Sportschau.de, 17. Februar 2013, afropen an‘ 21. Februar 2013