Dör de Laag op de Geest schuult vör dat Water weer de Ümgegend al fröh besiedelt. 1926 hebbt se to’n Bispeel en olen Sood ut de Tied von de Chauken in dat 2. Johrhunnert utgraavt.
Dat eerste Maal in de Oorkunnen kummt Stickenbüttel 1310 as Styckenbuttle vör. 1394 is Stickenbüttel tohoop mit Duhnen, Döös, Sahlenborg, Steenmarn un Ritzbüttel an Hamborg verköfft worrn.
Von 1905 af an is twischen Stickenbüttel un Duhnen dat Fort Thomsen anleggt worrn, dat helpen schull, de Elvmünn militäärsch to schulen. In’n Eersten Weltkrieg sünd negen Soldaten ut Stickenbüttel fullen oder vermisst[1].
Stickenbüttel is an’n 1. März 1935 mit de Gemeen Cuxhoben tohoopleggt worrn. Cuxhoben un Stickenbüttel hebbt noch bet to’n Groot-Hamborg-Gesett (1. April 1937) to Hamborg tohöört. Denn sünd se Deel von’n Kreis Land Hadeln worrn.
De Oort is nu dör den Tourismus präägt, aver dör sien Laag Stück wat binnenlands nich ganz so dull as Duhnen un Döös.
Dat Wapen wiest op blauen Grund un en gröön Footschild de Stickenbüttler Windeek in natürliche Klören (gröne Bläder un brune Bork) un en Hünengraff. De windscheve Windeek stünn siet 1928 ünner Naturschutz, müss aver 1981 fällt warrn.
Kultur
In Stickenbüttel gifft dat en Denkmaal för de Fullenen ut den Eersten Weltkrieg.
Museums
Stickenbüttel hett dat Wrackmuseum, dat in de ole Dörpschool ünnerbröcht is un 1980 apen maakt hett.
De Kreisstraat 2 löppt von Duhnen in’n Noordwesten na Westerwisch un Cuxhoben in’n Süüdoosten. In’n Noordoosten löppt de Stickenbüttler Weg na Döös un in’n Süüdwesten de Heiddeelweg na Sahlenborg.
