Dat Spital is wat buten de Stadt Winsen as Leprosenspital anleggt worrn. In de Oorkunnen dükert dat 1401 toeerst op.[1] De Stiftskapell is toeerst för 1445 nawiest. Von 1506 bet 1910 weren in dat Spital Prövners ünnerbröcht. Dat heet, dat ole oder kranke Lüüd dor Geld för betahlt hebbt, dat se in dat Spital en levenslang Recht harrn, dor to wahnen un pleegt to warrn. Dat hüdige Gebüüd is 1766 boot worrn un de Kapell 1750. Ehr Utsehn, so as wi dat vondaag kennt, hett se 1903 kregen. En Figur an’n Gevel von dat Spital wiest den hilligen Jürgen, na den dat Spital nöömt is, as Drakendöder.
Later is dat Gebüüd verfullen. Eerst in de Johren 1960 is dat wedder herricht worrn un an’n 22. Oktober 1966 hett dor en Museum apenmaakt. Dat Gebüüd is bet 1988 as Museum bruukt worrn. In dat Johr is dat Museum ümtagen in’n Marstall. Siet 1993 bruukt de Arbeiderwollfohrt dat Spital un de Kapell.
Footnoten
↑21. Juli 1401; bi Uta Reinhardt: Lüneburger Testamente des Mittelalters 1323 bis 1500, Hannover 1996, Nr. 58, Sied 85. toeerst explizit Leprosorium nöömt in: Lüneburger Testamente Nr. 103 von’n 4. Februar 1414
