Laag von Samtgemeen An’n Dobrook in’n Landkreis Cuxhoben (Koort lett sik anklicken)
Raadhuus in Kumbarg
De Samtgemeen An’n Dobrook weer en Samtgemeen in’n Landkreis Cuxhoben, in de sik söven Gemenen för dat Afwickeln vun de Verwaltenssaken tohoopslaten harrn. Se hett von 1965 bet 2016 bestahn. De Sitt weer in Kumbarg.
De Samtgemeen An’n Dobrook is an’n 1. Juni 1965 ut de Gemenen Kumbarg, Wingst un Oppeln billt worrn. An’n 1. Januar 1970 sünd ok Bülkau un Öberndörp to de Samtgemeen mit tokamen un an’n 1. Januar 1972 de Gemenen Neehuus, Belen, Kedenbrook un Geversdörp. De Samtgemeen harr denn negen Gemenen. An’n 1. Juli 1972 is de Gemeen Oppeln Deel von de Gemeen Wingst worrn un Kedenbrook Deel von de Gemeen Belen. In de Samtgemeen weren nu noch söven Gemenen tohoopslaten.
De Dubbelspitz ut Samtgemeenbörgermeester un Samtgemeendirekter is 1996 oplööst worrn.
Wapen un Flagg
Dat Wapen wiest baven vörn op grönen Grund en sülvern Dann op en sieden sülvern Barg, baven achtern op sülvern Grund en rood Möhlenrad un ünnen in’n Schildfoot op blauen Grund twee gollen Haverohren mit je fiev Haverköörn.
Dat Wapen hett de Regerungspräsident von’n Regerungsbezirk Stood an’n 10. Januar 1966 genehmigt. De Dann stammt ut dat Wapen von de Wingst, dat Möhlenrad ut dat Wapen von Kumbarg un de Haver ut dat Wapen von Oppeln.
De Flagg von de fröhere Samtgemeen is baven gröön un ünnen swart un wiest in de Midd dat Wapen.
Partnerschoppen
De Samtgemeen hett 2005 en Partnerschop mit de Gemeen Witkowo in Polen slaten.
