De Partei Rechtsstaatlicher Offensive weer en rechtskonservative Lüttpartei in Düütschland, de dat vun 2000 bit 2007 geven hett. Vun 2001 bit 2004 weer se an de Regeeren in Hamborg bedeeligt. De Parteihistorie lett sik klor in twee Phasen ünnerdelen. De eerste Phaas weer de so nöömte „Ära Schill“, de vun de Pateigrünnen in 2000 bit Anfang 2004 anduert hett un vör allen dör at Wirken vun den Grünner un eersten Vörsitter Ronald Schill präägt weer. He gell in disse Tiet ok as dat Uthangschild vun de Partei. De tweete Phaas füng an, as Schill vun de Partei weggaan weer. Se weer kenntekent dör den langsomen Verfall vun de Bedüden, wat an’n Enn in 2007 to’n Oplösen vun de Partei föhrt hett.
In jemehr Historie bruuk de Partei tohopen dree Kortbeteken: To Anfang weer PRO de offizielle Kortform, man dat müss de Partei 2001 nageven, vun wegen dat de Partei Pro DM klaagt harr. Dorna hebbt se sik na jemehrn Grünner Schill nöömt, un weern bit Volk dorüm tomeist as „Schill-Partei“ betekent. As de denn aver ut de Partei rutgahn weer, nööm se sik bit to ehr Oplösen Offensive D.
Inholtlich Profil
Wenn sik de Partei sülvst dorstellen dee, wies se jümmer dorop hen, dat se nich in de Kategorien rechts oder links beshreven warnn künn. Aver, in de apentlichen Diskusschoon is de Partei deelwies as rechtsbörgerlich, tomeist aver as rechtspopulistische Protestpartei opfaat worrn. Vun 2004 an hett se sik mehr Möh geven, en freeheitlich Profil optoboen un orienteer sik siet de Tiet an Jörg Haider. Dorför hett sik de Partei gröttstendeels as en rechtskonservativ Anhangsel vun de CDU sehn.[1]
In dat Programm verklor de Partei Rechtsstaatlicher Offensive, dat se sik för de na jemehr Sicht notwännige Verstarken vun de binneren Sekerheit insetten wull. Se wullen dör „Sekern“ gegen den Terror angahn. Allgemeen schüll dat dör en kunsequente Straafverfolgen un Anwennen vun de Gesetten maakt warrn, wobi dat Recht vun de Oppers eendüdigen Vörrang hebben schüll för dat Recht vun de Deders. In de Weertschopspolitik harrn se en liberalen Standpunkt, in de Sozialpolitik weern soziale Themen de Sworpunkt. Hartz IV hebbt se to’n Bispeel aflohnt.
Se harrn de Ansicht, dat de Freeheit vun’n Börger in Düütschland nich mehr geven weer, vun wegen dat de Staat to dull vördrungen is, wat sik dör de ollen Parteien to sehn weern. Butendem stünn de Partei för en Utlännerpolitik mit mehr Grenzen, üm dat en „sekere Utlännerpolitik“ mööglich warrn schüll. Dat Towannern schüll strenger kontrolleert warrn un gegen den Missbruuk vun Asyl starker angahn warrn. Dat Asylrecht schüll na jemehr Ansicht ut de Verfaten rutnahmen un as eenfack Gesett verankert warrn. De multikulturelle Sellschop lohnen se af, jüst so ok den plaanten Instieg vun de Törkie in de EU.
Finanzen un Vermögen
Na de Bundsdagsdrucksaak 16/5230 harr de Partei in’t Johr 2005 Innahmen vun ruchweg 350.000 Euro, wovun 64.000 Euro ut Bidrääg un 112.000 Euro ut Spennen kamen sünd. Üm un bi 170.000Euro kemen ut staatliche Geller. In’t Johr 2005 hett de Pareti en Överschuss vun 20.000 Euro maakt. Dat Johr dorvör hett se ruchweg ’n halve Million Euro verloren. 2005 kreeg de Partei keen Grootspenn vun mehr as 10.000 Euro.
Dat Reinvermögen vun de Partei weer toletzt vun wegen Darlehens un Krediten in de Miesen un belöppt sik op ruchweg -1.200.000 Euro. De gröttste Darlehensgever weer de ehmolige Partei-Liddmaat Ulrich Marseille mit üm un bi 880.000 €. De Tinsen vun bi 53.000 € wull he nich wedderhebben un sünd em as Spenn gootschreven worrn.
Na egen Utkumst harr de Partei keen Vermögen ut Immobilien un ok keen Andelen an Ünnernehmen.
Struktur
De Partei weer in föffteihn Landsverbännen opdeelt, wobi de Länner Sassen un Döringen tosamen een Landsverband billt hebbt. Dorünner geev dat Bezirks- un Kreisverbännen in grode Tall. De Jöögdorganisatschoon vun de Partei weer de Junge Offensive Deutschland e.V. (JO). En wietere Ünnerorganisatschoon vun de Partei weer de Kommunalpolitische Vereinigung der Offensive D (KVO), in de all kommunalen Mandatsdräger binnen weern. De Versök, mit de Sportoffensive en wietere Vörfeldorganisatschoon optoboen, hett aver blots korte Tiet överduert.
In kreisfre’e Städer un Landkreisen kreeg de Partei twüschen 2003 un 2007 bi Kommunalwahlen tosamen 15 Sitten:
Teihn Mandaten hett se 2003 – noch ünner de Beteken Schill – in Brannenborg kregen, dorünner veer in’n Landkreis Märkisch-Oderland un dree in’n Landkreis Barnim. Vun 2004 an hett se as Offensive D veer Kreisrööt in Sassen-Anholt un een Liddmaat in’n Raat vun de Stadt Düörpm stellt, de aver Enn 2004 wedder ut de Partei rutgahn is.
Historie
De Ära Schill
Vörhistorie un Grünnen
De zentrale Figur för de Billn vun de Partei Rechtsstaatlicher Offensive weer Ronald Schill, de as Amtsrichter in Hamborg dör sien Oordelen Acht op sik togen hett, vun wegen dat dat Straafmaat faken hooch, vun eenige Kritikers ok as överdreven hooch kritiseert weer. He hett mehrmols den Ümgang vun den root-grönen Senat mit Straafdeders as to leeflich betekent. Vun wegen dat Schill jümmer mehr Toloop kreeg un to Vördrääg inlaadt worrn is (t. B. vun CDU-Oortsverbännen) is in’n Harvst 1999 to’t Grünnen vun de Initiative „Ik will Schill!“ kamen, de sünners vun de Versekerungsmaklersche Peggy Rasch mit Help vun Brigitte Dettmer un Andrea Timpe vörandreven weer.
Ut disse Initiative rut hett sik de Partei Rechtsstaatliche Offensive an’n 13. Juni 2000 in Hamborg as Partei op Landseven grünnt. De Kortbeteken weer toeerst PRO. De bekanntste Liddmaat un eerste Vörsitter weer Ronald Schill, un de Partei weer heel un deel op sien Person utricht. To’n binneren Kreis tellen de Spirituosenhersteller Franz Joseph Underberg, de langjohrige Sportjournalist vun’n NDR-Höörfunk, Rainer Koppke, as Pressespreker un Björn N. Neumann, de lange Johren bi de CDU weer un dorna de persönliche Referent vun Schill worrn is. Bito höör dor ok Peggy Rasch mit bi. Tallriek kemen in’n Vörfeld vun de Börgerschopswahl 2001 ok Lüüd dorto, de vörher bi de Hamborger CDU un SPD weern, man mit jemehr Parteien nich tofreden weern, as ok ehmolige Aktivisten ut de STATT Partei.
Vun wegen en Klaag vun de Partei Pro DM müss de Beteken PRO den aver opgeven warrn[2], so dat de Kortbeteken in Schill ümännert worrn is. De Partei hett sik dorophen ok offiziell as „Schill-Partei“ betekent un is ünner den Naam ok bekannt worrn.
Bedeligen an de Regeeren
Bi de Hamborger Börgerschopswahlen an’n 23. September 2001 is de Schill-Partei op’n Slag mit 19,4 %Prozent vun de Stimmen as drüttstarkste Kraft mit 25 Afordenten in de Hamborger Börgerschop intogen. De vörherige roor-gröne Senat ünner Ortwin Runde harr dormit sien Mehrheit verloren. Dat Resultat weer as sensatschonell instoopt un dorop torüchföhrt, dat de Hamborger untofreden weern mit de langjohrigen Politik vun de SPD in de Stadt. Dorto keem ok de Untofredenheit mit de CDU as Oppositschoonspartei, de man en düütliche Vebetern nich totroet hett.
In en Koalitschoon mit de CDU un de FDP keem de Schill-Partei so gliek in de Regeeren un hett dormit dat eerste Wahlteel, dat se sik sett harr, henkregen, neemlich de SPD na ohrteihnten ut de Regeeren in Hamborg ruttosmieten. Ronald Schill is Binnensenater un Tweete Börgermeester worrn. Mario Mettbach is Senater för’t Bowesen un Peter Rehaag Senater för Ümweölt un Gesundheit worrn.
Mucken binnen de Partei un Afplitten
Anfang 2002 geev dat in’n Vörstand vun de Partei mehrere Ännern, vun wegen, dat se sik dor nich ganz gröön weern. Bi de Landdagswahl in Sassen-Anholt an’n 21. April 2002 weer de Ünnernehmer Ulrich Marseille de Kandidat an de Spitz. Man, vele in de Partei hebbt em nich as Spitzenmann acht un hebbt denn de Rechtsstaatliche Bürger Partei (R-B-P) grünnt, de ok bi de Wahl anpeddt is.[3]. Wiel de R-B-P blots 0,1 % vunde Stimmen kregen hett, is de Schill-Partei blots knapp mit 4,5 % an de 5-%-Hürd hangen bleven.
Neeliddmaten müssen op jemehrn Andrag op Bitritt verkloren, dat se vörher noch keen MLiddmaat vun en radikalen Partei wesen sünd. Liddmaten vun de NPD, de versöcht harrn de Partei in Lübeck to ünnerwannern, sünd vun de Partei foorts wedder utslaten worrn, as dat rutkamen is. De Sleswig-Holsteensche Verfatensschuul heet togeven, dat een vun disse NPD-Liddmaten as en so nöömten V-Mann registreert weer, hett sik aver gegen den Verdacht verwohrt, de Partei mit Afsicht ünnerwannern to wullen.
Ok de Bezirksvörsitter vun de Partei in Düsseldörp, Frederick Schulze, de vörher Bundsdagsafordente vun de CDU wesen is, is op Initiaive vun Schill ut de Partei utslaten worrn, vun wegen dat de in sien Biwesen an’n 21. Oktober 2002 bi en Veranstalten to Gegendemonstranten ropen hett, se ‚schülln sik lever Arbeit söken, vun wegen dat Arbeit free maakt‘. In de Tiet, as de Partei sik op’t hele Bundsrebeet utwieten dee, hebbt jümmer wedder annere Lüüd versöcht, SChill de Föhrensrull in de Partei aftonehmen, so ünner annern René Schneider. Schneider un SChulze hebbt tosamen de Pro-Börger-Partei (PBP) grünnt, de in de Twüschentiet aver oplöst worrn is un över enkelte Kommunalmandaten nich rutkamen sünd.
Bundswiet Utdehnen
Ronald Schill hett sik för en langsomen un bestännigen Utbo vun sien Partei insett un weer düttlich dorgegen, dat de Partei bi de Bundsdagswahl 2002 anpedden wull. Man, he keem gegen dat Votum vun de Parteibasis vun’n 22. juni 2002 nich an.
De Apentlichen Wahlkampoptreden un Parteiversammeln vun de Schill-Partei sünd regelmatig vun Gegendemonstranten stört un to’n Deel sogor sprengt worrn. In enkelte Fäll hett Schill den Verdacht utsnackt, dat de Binnenministers vun de Länner mit Afsicht to wenig Polizeikärft to’n Schulen vun de Veranstalten praatstellt harrn. Man, en Bewies harr he för sien Behaupten nich.
To’n Schandaal keem dat an’n 29. August 2002, as Ronald Schill to’t Thema Elvhoochwater in’n Bundsdag snacken wull. Em weer bi sien Reed opletzt dat Mikrofon afstellt worrn, vun wegen dat de Bundsdagsviezpräsidentin Anke Fuchs meen, dat he sien Tiet för de Reed al övertogen harr. In de Reed hett Schill dat Fehlen vun Middel för de Flootoppers för allen op en to geevfründliche Inwannern- un Entwickelnspolitik torüchföhrt. In de Medien is he dorför gresig kritiseert worrn. Wiel in de Parteiföhren to’n eersten mol ok Stimmen to hören weern, de an Schills Optreden Kritik öven, is sien Reed na buten op offizielle Parteiveranstalten un in’t Nett wieterverbreedt un verdeffendeert worrn. De Partei harr dorna en sprunghaft Anstiegen bi de Tallen vun de Liddmaten.
Bi de Bundsdagswahl an’n 22. September 2002 hett sik de Schill-Partei in 15 Bundslänner opstellen laten. Se kreeg bundswiet 0,8 % vun de Stimmen, in Hamborg 4,2 %. In’n Februar 2003 is in Bremen de Bundsverband vun de Schill-Partei grünnt worrn. Vörsitter weer Mario Mettbach, Ronald Schill is to’n Ehrenvörsitter wählt worrn, de ok in de Bundspartei de bekanntest un an’n meisten wohrnahmen Vertreder weern. Bi wietere Landdagswahlen künn de Partei wedder nich över de 5-%-Hürd kamen, weer in’t Fröhjohr 2003 aver för korte Tiet mit een Afordenten (Mathias Henkel) in de Bremer Börschop vertreden. He weer kort vör de Börgerschopswahl 2003 vun de CDU in de Schill-Partei wesselt, vun wegen dat de mit ehr Sworpunktthema in’n Bremer Wahlkamp, de Aflohnen vun Deerversöken, in sien Ogen en christlichere Positschoon harrn as de CDU.
Tonehmen Striet in de Partei
In’n Sommer keem de Staatsraat vun de Binnenbehöörd un Schill-Vertrooten Walter Wellinghausen in de Dagblööd, vun wegen dat he blangen sien Amt noch as Afkaat un as Opsichtsraat vun een Krankenhuus arbeiden dee. As de Eerste Börgermeester, Ole von Beust (CDU), Wellinghausen afsetten wull, ahn dat mit Schill to besnacken, geev dat an’n 19. August 2003 ’n persönlichen Striet mit Schill un as Naklapp en Rgeerenskries in Hamborg.
Dorna hett Beust ok Schill ut sien Amt smeten un hööl em vör, dat he em erpressen (Chantaasch) wull, as he em drauht harr, sien angeevlich Leefkuntakt twüschen em un den Justizsenater Roger Kusch (CDU) publiek to maken. Schill segg dorto, he harr „blots an Ole vun Beust appelleert, nich mit twee Maten to meten“. He harr den Fall vun sien Parteikollegen Mettbach nöömt, den von Beust dwungen harr, de Instellen vun sien Levenspartnersche as Referentin wedder torüchtonehmen. An’n 3. September 2003 weer de Kries eerstmol överwunnen, as Schills Büroleider Dirk Nockemann sien Nafolger as Binnensenater worrn is. Mario Mettbach hett tosätzlich to sien Senaterposten dat Amt vun’n Tweeten Börgermeester övernahmen, dat Schill ok bekleedt harr.
An’n 6. Dezember, as Schill jüst as Vörsitter vun’n Hamborger Landsverband wedderwählt worrn is, geev he för den Regionalsenner Hamborg 1 to den Wahl twee Interviews. Dorbi hett he von Beust vun wegen sien Woortwahl an’n Dag vun sien Utsluss beschulligt un hett Nockemann sien Help anboden bi’t Utföhren vun sien Amt. Disse Snack is nu aver vun de föhren Politikers uvun de Hamborger Koalitschoon so opfaat worrn, dat Nockemann nich de notwännige Kennis vun de Saak harr, worophen von Beust den Bundsvörstand vun de Partei Bescheed geev, dat se för de Tokunft disse Dweerdrievereen vun Schill ünnerbinnen schulln. In de Folg hett de Bundsvörsitter Mettbach Schill scharp kritiseert un vun em foddert, sien Ansichten blots na Afspraak mit den Bundsvörstand apen to vertellen. Schill hett dat as „Mafiamethoden“ betekent un lohn dat af, so dat de Bundsvörstand vun de Partei em dat Amt as Landsvörsitter wegnahmen hett un gegen Schill en twee Johr duern Verbott utspreken deen, Ämter in de Partei to föhren. Na Schill weer dat gegen de Satzung vun de Partei.
De Striet binnen de Partei is in de folgenden Daag wieter opbruust, so dat de Regeerenskoalitschoon an’n Enn twei bröök, as Schill künnig maakt harr, tosamen mit Parlamentariers, de to em stünnen, in enkelte Punkten, villicht sogor gegen Regeerensbeslutens to stimmen un dormit de Mehrheit vun de Regeeren in Gefahr to bringen. Vun wegen dat Ole von Beust nich Willens weer, dat wieter hentonehmen, sünd Neewahlen för de Hamborger Börgerschop ansett worrn.
Lösen vun Schill
De Bundsvörstand vun de Partei hett an’n 16. Dezember 2003 den Partei- un Frakschoonsutsluss vun Schill beslaten. De Form, de dorbi vun Bundsvörstand anwennt worrn is, ahn klor defineerten Grund un ahn en Parteischiedsgericht is vun Verfatensrechtlers dull kritiseert worrn. Mööglich worrn is dat dör en Ännern vun de Parteisatzung, de von Mettbach en Maand vörher inbröcht worrn is.
Tallrieke Landsverbännen, de Schill ünnerstütt hebbt, hebbt na de Sitzung seggt, dat se vun de Hamborgers överrumpelt worrn sünd. En rechtlich Klären vun de Vörgäng harr eerst na de Neewahlen stattfinnen künnt, so dat Schill an’n 18. Dezember tosamen mit fief ehmolige Frakschoonsliddmaten, de sik mit Schill solidariseert harrn, de Ronald-Schill-Frakschoon grünnt hett.
Butendem güng Schill mit de Partei vun Bolko Hoffmann, Pro DM to de List Pro-DM/Schill tosamen. Noch vör de Wahl künn Schill en Gerichtsoordeel dörbringen, wat sien ehmolige Partei ünnerseggen de, wieterhen de Beteken Schill-Partei to föhren. Kortfristig hett de Partei also na en ne’en Naam söcht, un versöch sik as PaRO un Offensive en nee Image optoboen.
Bi de Börgerschopswahl an’n 29. Februar 2004 bleven de ListPro-DM/Schill mit 3,1 % as ok de Partei Rechtsstaatlicher Offensive mit 0,4 % vun de Stimmen beid ünner de Fief-Prozent-Hürd. Dorna geev dat en massenhaften Uttritt vun de Spitzenkräft in de Partei. Na de verloren Wahl is de Partei politisch ahn Bedüden worrn un ok bleven. Vun de Figuren an de Spitz bleev anfangs blots Norbert Frühauf, de vun 2001 bit 2004 de Frakschoonsvörsitter in de Börgerschop weer, in de Partei. De vörmoligen Senaters Mario Mettbach, Peter Rehaag un Dirk Nockemann sünd dorna na de CDU wesselt.
De Ära na Schill
As de Partei bi de Hamborger Börgerschopswahl vun 2004 ahn Naams-Kortform anpeddt sünd, hett se ehr satzunsmatige Kortform vun Schill op Offensive D ännert. De ne’e Bundsvörsitter vun de Partei is Markus Wagner worrn. Blots wenige Daag na sien Wahl hett he to verstahn geven, dat he sik neeger an den bekannten Rechtspopulisten Jörg Haider, den öösterriekschen Landshauptmann vun Kärnten, bewegen wull, as he em to sien Wahlsieg bi de Landdagswahl vun Kärnten an’n 7. März 2004 gratuleert hett. To Schills Tieten weer so en parteioffizielle Anneegern jümmer aflohnt worrn. Wat he ok kritiseer weer dat Image as „betere CDU“, dat de Partei na sien Ansicht in de Ära Schill pleegt harr. He meen, dat dit Image – blangen de Sülvsttonichtenmaken dör de Person Schill – de Hööftgrund weer för de Neddergang vun de Partei Anfang 2004. Man bi de Lüüd fünn de Partei siether nich mehr so veel Acht.
In’n Rahmen vun de Landagswahlen in Sleswig-Holsteen an’n 20. Feburar 2005 keem de Spitzenkandidat Folker Küster in de Daagblööd, vun wegen dat he de Vadder vun Estefania Küster, de dormolige Leefste vun Dieter Bohlen weer. Man, bi de Wahlen hett de Partei liekers blots 0,1 % vun de Stimmen kregen.
De Hamborger Landsverband hett an’n 22. Februar 2005 bekannt geven, dat he sik oplösen deit. De Landvörsitter Hagen Riemann hett dat mit den vun Wagner anstüerten Rechtsruck vun de Bundspartei begrünnt, de in de Twüschentiet ok Personen ut dat rechtsextremistische Ümfeld opnehmen dee. Wagner meen dorto, dat en Oplösen ahn Besluss vun’n Parteidag rechtlich nich dee. Man, na Riemann weern an Vördaag 233 vun de in Hamborg nableven 270 Liddmaten ut- oder torüchpeddt, dorünner ok eenige Landsvörstandsliddmaten un Bezirks- un Oortsvörstännen. De Landsverband Hamborg is aver faktisch nienich oplöst worrn un weer vun Mitt 2005 an wedder aktiv. Ünner annern keemen in de Tiet dorna eenige vun de Grünnensliddmaten wedder na de Partei torüch.
In’n April 2005 hett de Partei en Tosamenarbeit mit de DSU beslaten. As ok annere Lüttparteien hebbt se vör’t Bundsverfatengericht gegen de sworeren Bedingen för de lütteren Parteien klaagt, för’t Deelnehmen an de vörtogen Bundsdagswahlen an’n 18. September 2005. de Klaag weer aver nich tolaten. Bi de Bundsdagswahlen 2005 kreeg de Partei blots 0,1 % vun de Tweetstimmen. In Sassen-Anholt harr se noog Ünnerschriften to’n Ünnerstütten sammelt, dat se dor mit en egen List anpedden künn. In’n November 2005 hett se Inspruch inleggt na’t Bundswahlprüfensgesett, vun wegen dat na Angaven vun de Offensive D de verkehrte Verdelen vun de Mandaten en Wedderhollen vun de Wahl na sik tehn müss. Na de Bestimmen vun’t Grundgesett Art. 41 Afs. 1 Satz 1 un na dat Wahlprüfensgesett warrt de Wahlinspruch vun’n 15. November 2005 nu ünner’t Aktenteken WP 158/05 in’n Bundsdag föhrt.
To de Landdagswahl in Sassen-Anholt an’n 26. März 2006 hett sik de Offensive D tosamen mit de STATT Partei un de DSU op en gemeensome List opstellen laten. De List weer „Bündnis Offensive för Sassen-Anholt“ nöömt un kreeg 0,3 %. In dat glieke Johr peddt de Partei ok in Berlin un Mekelnborg-Vörpommern an un hett beidmolen 0,1 % kregen.
Vun November 2006 bit Januar 2007 hebbt de Hamborger Landsverbännen vun Offensive D, Zentrumspartei un De Grauen – Grau Panthers tosamen dree gemeensome Podiumsdiskusschonen afhollen ünner dat Motto „Macht Deutschland nicht kaputt“. In’n Dezember 2006 güngen dree Vörstandsliddmaten un 24 wietere ut den Landsverband Berlin rutgahn un in de Dütsche Partei (DP) wesselt. Al to de Berlin-Wahl an‘n 17. September 2006 sünd eenige Liddmaten vun Offensive D un DS op en gemeensome List anpeddt.
De Bundsvörsitter Markus Wagner hett op’n Bundsparteidag Anfang Dezember 2006 künnigt maakt, dat he ut persönliche Grünnen vun’n Vörsitt torüchpedden wull. Peter-Alexander von der Marwitz hett kommissaarsch dat Amt övernahmen bit to de plaanten Neewahl vun’n Bundsvörstand, de bi den tokamen Bundsparteidag an’n 31. März 2007 stattfunnen hett. Wolfgang Jabbusch weer denn to’n ne’en Bundsvörsitter, as de Hamborger Landsverband ünner dat Regeer vun von der Mahrwitz mit ruchweg 30 Liddmaten slaten ut de Partei utpeddt is, üm dat se to de Zentrumspartei wesseln wullen. Al binnen een Maand weern twee Liddmaten vun’n nee wählten Bundsvörstand wedder utpeddt.
Von der Marwitz wull de Partei al to’n 31. März 2007 in en indragen Vereen ümwanneln, man dorför hett he op’n Parteidag keen Mehrheit funnen. In de folgen Maanden weern twee Süümnisoordelen mit vörlöpig Vullstreckborkeit gegen de Partei utspraken, de ünner annern de Kontopannen as Naklapp harr. Op den folgen Parteidag an’n 29. September 2007 weer denn de Ümwanneln in en Vereen beslaten un de Bundsvörstand is torüchpeddt. Martin Schleifenbaum weer insett, üm de Oplösen dortoföhren. De Oplösen as Partei is an’n 29. Oktober 2007 rechtskräftig worrn.[4]
Landdagswahlresultaten vun de Partei
|
|
BW
|
BY
|
BE
|
BR
|
HB
|
HH
|
HE
|
MV
|
NI
|
NW
|
RP
|
SL
|
SN
|
ST
|
SH
|
TH
|
| 2001
|
n.a.
|
|
n.a.
|
|
|
19,4%
|
|
|
|
|
n.a.
|
|
|
|
|
|
| 2002
|
|
|
|
|
|
|
|
1,7%
|
|
|
|
|
|
4,5%
|
|
|
| 2003
|
|
n.a.
|
|
|
4,4%
|
|
0,5%
|
|
1,0%
|
|
|
|
|
|
|
|
| 2004
|
|
|
|
0,3%
|
|
0,4%
|
|
|
|
|
|
n.a.
|
n.a.
|
|
|
n.a.
|
| 2005
|
|
|
|
|
|
|
|
|
|
0,0%
|
|
|
|
|
0,1%
|
|
| 2006
|
n.a.
|
|
0,1%
|
|
|
|
|
0,1%
|
|
|
n.a.
|
|
|
0,3%¹
|
|
| 2007
|
|
|
|
|
n.a.
|
|
|
|
|
|
|
|
|
|
|
¹ Wahlbund „Bündnis Offensive för Sassen-Anholt mit STATT-Partei un DSU
n.a. - nich anpeddt
Borns
- ↑ Zitat vun Ronald Schill: „Wi sünd en CSU vun’n Norden!“
- ↑ Schill wird Frontmann der Pro DM-Partei, 04. Januar 04
- ↑ Schill-Partei in Sachsen-Anhalt gespalten, 4. Dezember 01
- ↑ Fastsetten vun de staatlichen Middel för dat Johr 2007 (Stand: 28. Januar 2008) op bundestag.de
