De Oxter Beek is en 6,5 Kilometer langen Beek in’n Landkreis Cuxhoben, de in de Noordsee münnt.
De Beek hett sien Born an’n Noordrand von Noordholt, nich wied von dat Huus Noordweg 149. Dat Rebeed liggt an’n Rand von de Geest hen na de Masch. Von dor flütt he na Westen twüschen Noordholt un Ox langs. He billt hier de Grenz twüschen Land Wusten un dat fröhere Amt Ritzbüttel. Bi’n Ne’en Weg nimmt he von links de Elfter Balje op. Bi dat Spieker Neefeld is de Beek över de Spiek-Neefeller Waterlöös mit de Spieker Waterlöös verbunnen. Dat Water flütt hier denn dör en Siel ünner den Diek dör na dat Butendieksland un flütt tohoop mit de Spieker Waterlöös in de Noordsee.
Fröher is de Loop von’n Oxter Beek in de Neegd von’n Ne’en Weg na Noorden afknickt un is denn bet na’n Noordrand von dat Neefeld flaten. En Stück in’n Süüdwesten von Berensch güng dat denn mit en Siel ünner’n Diek dör.
De Oxter Beek as Grenz twüschen dat Amt Ritzbüttel un Wusten is 1586 in’n Buxthuer Rezess fastleggt worrn. 1589 is ok de Schedelsteen bi Berensch opstellt worrn, de de Grenz markeren dee, wat vör allen wichtig weer för strannte Scheep (Strandrecht).
Koordinaten:53° 47′ N, 8° 33′ O
