In de Oorkunnen kummt Oosten toeerst 1220 as by de Osten vör. 1391 hett dat en Stormflood geven, bi de Fährweg, Slüüs un Kark sworen Schaden afkregen hebbt. 1717 sünd bi de Wiehnachtsflood 17 in Oosten doodbleven un an’n 15. November 1773 sünd bi en Füür 43 Hüüs dalbrennt. Ok bi de Stormflood 1962 hett de Oort wedder wat afkregen.
1909 hebbt se denn twüschen Oosten un Basbeek de Sweevfähr boot, vörher harr dat jümmer blots en Fähr geven un keen fasten Weg över de Oost. Nadem se 1974 de Oostbrügg von de B 495 boot hebbt, warrt de Sweevfähr blots noch för den Tourismus bruukt.
1852 is Oosten de Seet von dat Amt Oosten worrn. Dit Amt is denn 1885 Deel von’n Kreis Neehuus worrn un 1932 von’n Landkreis Land Hadeln. 1977 keem de Oort denn an’n Landkreis Cuxhoben.
Von 1964 bet 1972 weer Oosten Deel von de Samtgemeen Oosten. 1972 is Oosten mit Olendörp un Isensee to de ne’e Gemeen Oosten tohoopslaten worrn.
Dat Amtsgericht Oosten, dat 1852 inricht worrn is, hett 1973 dichtmaakt.
En Denkmaal för de Fullenen ut de twee Weltkrieg’ un den Düütsch-Franzööschen Krieg von 1870/1871 steiht bi de Kark. Dat Denkmaal is 1921 boot worrn.
Museums
Oosten hett en Buddelmuseum dat en poor dusend Buddeln wiest, de Jan ten Doornkaat sammelt hett.
Verenen
De Turn- un Sportvereen Oosten is 1893 grünnt worrn un de Schützenvereen 1874. De Freewillige Füürwehr is an’n 6. März 1924 grünnt worrn, en Füürwehrmannschop un Füürsprütt harr dat vörher aver al siet 1776 geven.
Weertschop un Infrastruktur
Verkehr
Oosten liggt an de Bundsstraat 495, de in’n Noordoosten över Schüttdamm, Neelannermoor un Neeland an de Landsstraat 111 ranlöppt. In’n Süüdwesten löppt de B 495 na Basbeek/Warstood un is dor mit de B 73 verbunnen. De B 495 geiht denn wieder na Loomst. Ans gifft dat noch en lüttjere Straat an’n Oostendiek langs, de na Achthöbenerdiek un Rönndiek löppt.
