De Oort hett vör 1885 to de Vaagdie Kerklinneln in dat Amt Veern tohöört. Na 1885 weer dat in’n Kreis Veern, de 1932 mit’n Kreis Achem tohoopleggt worrn is un den ne’en un grötteren Kreis Veern billt hett.
Odeweg un Schepinkel hebbt von öllers een Gemeen billt. Disse Gemeen hett bet 1954 den Naam Odeweg dragen, hett sien Naam denn aver op Schepinkel ännert. De Gemeen is an’n 1. Juli 1972 mit de Gemeenreform in Neddersassen Deel von de Gemeen Kerklinneln worrn. Sietdem billt Schepinkel en Oortschop mit egen Oortsvörsteiher binnen de Gemeen Kerklinneln.
De Schütten ut Odeweg sünd in’n Schüttenvereen Schepinkel-Odeweg aktiv.
Weertschop un Infrastruktur
Sprüttenhuus in Odeweg
För Odeweg is de freewillige Füürwehr Schepinkel tostännig, de 1941 grünnt worrn is. Dat Sprüttenhuus steiht in Odeweg.
Verkehr
Dör Odeweg löppt de Kreisstraat 32, de in’n Süüdoosten över Dreßel na Jeddingen an de Landsstraat 171 ran föhrt un in’n Westen na de K 18. De K 18 geiht in’n Westen na Groten Zähln, Lüttjen Zähln, Kreepm un Brammer un in’n Süden na Schepinkel un an de L 171. De L 171 geiht in’n Süüdwesten na Kerklinneln un Veern un in’n Noordoosten na Visselhöövd.
De nächste Bahnhoff is so bi negen Kilometer wied weg in’n Oosten de Bahnhoff Visselhöövd an de Bahnlien Ülzen–Langwedel. De Bahnlien is 1873 anleggt worrn. Bet 1987 hett dat ok an’n Bahnhoff Bennbössel noch Personenverkehr geven, de blots veer Kilometer wied weg weer.
Scholen
Odeweg harr von 1844 af an en egene Volksschool, na de ok de Kinner ut Schepinkel güngen. De School hett 1965 dichtmaakt. Vondaag gaht de Kinner na de Grundschool Bennbössel.
↑Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 174
↑Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 180
