PROFILBARU.COM

Wapen/Flagg

Koort

Basisdaten

Bundsland: Neddersassen

Landkreis: Oosterholt

Gemeen: Worpsweed

Inwahners:

851 (2010-12-3131. Dezember 2010)

Postleettall:

27726

Vörwahl:

04792

Geograafsche Laag:

Koordinaten:53° 16′ N, 8° 60′ O53° 16′ N, 8° 60′ O

Nee Sankt Jürgen (hoochdüütsch Neu Sankt Jürgen) is en Dörp in de Gemeen Worpsweed in’n Landkreis Oosterholt, Neddersassen. Binnen de Gemeen Worpsweed billt de Oort vondaag en egen polietsche Oortschop.

Geografie

De Oort liggt in dat Lange Moor, wat en Deel von dat Düvelsmoor is. Dat Water ut dat Rebeed warrt deelwies över Gravens na’n Reithbeek afföhrt un to’n grötteren Deel över’n Nee Sankt Jürgener Schippgraven na de Hamm.

De Naveröörd sünd Huttenbusch, Fiefhusen un Breddörpermoor in’n Noorden, Breddörp in’n Noordoosten, Hepst in’n Oosten, Tarms un Tarmstermoor in’n Süüdoosten, Tüschendörp, Adelsdorp, Slussdörp, Winkelmoor un Mevenst in’n Süden, Överhamm in’n Westen un Düvelsmoor un Vieh in’n Noordwesten.

Historie

Nee Sankt Jürgen is 1752 as 5,5 Kilometer lang Stratendörp un Moorkolonie grünnt worrn. Dor sünd 45 Huussteden mit je 50 Calenberger Morgen Land anleggt worrn.

In’n Eersten Weltkrieg sünd 22 Soldaten ut Nee Sankt Jürgen fullen oder vermisst un in’n Tweten Weltkrieg 37.^[1]^[2]

Verwaltungsgeschicht

In de Franzosentied von 1810 bet 1814 hett de Oort to de Mairie Worpsweed in’n Kanton Leendaal höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1852 to de Moorvaagdie Huttenbusch in dat Amt Otterbarg tohöört un denn von 1852 bet 1885 to dat Amt Leendaal. Na 1885 weer dat in’n Kreis Oosterholt, de 1932 mit’n Kreis Blomendal to’n ne’en un grötteren Kreis Oosterholt tohoopgahn is.

De Oort is an’n 1. März 1974 mit de Gemeenreform in Neddersassen Deel von de Gemeen Worpsweed worrn. Mit dissen Dag is ut de Gemeen Nee Sankt Jürgen denn de polietsche Oortschop Nee Sankt Jürgen worrn, de en egen Oortsraad un Oortsbörgermeester harr. Mit de Kommunalwahlen in Neddersassen 2011 sünd de Oortsrääd un Oortsbörgermeesters in de Gemeen Worpsweed to’n 31. Oktober 2011 afschafft worrn. Sietdem hett de Oortschop blots noch en Oortsvörsteiher.

Inwahnertall

Johr	Inwahners
1791-00-001791^[3]	45 Füürsteden
1812-00-001812^[4]	329
1824-00-001824^[5]	45 Füürsteden
1848-00-001848^[6]	392 Lüüd, 51 Hüüs
1871-12-011. Dezember 1871^[7]	437 Lüüd, 71 Hüüs
1885-12-011. Dezember 1885^[8]	416 Lüüd, 68 Hüüs
1905-12-011. Dezember 1905^[9]	406 Lüüd, 73 Hüüs
1910-12-011. Dezember 1910^[10]	419
1925-00-001925^[11]	446
1933-00-001933^[11]	443
1939-00-001939^[11]	437

Religion

Nee Sankt Jürgen is evangeelsch-luthersch präägt un höört to dat Kaspel von de Zion-Kark in Worpsweed.

För de Kathoolschen gifft dat in Worpsweed de Maria-Freden-Kapell, de to de Goden-Hirt-Kark in Leendaal höört. De Goden-Hirt-Kark höört siet 1. September 2012 to de Karkengemeen von de Hillige-Familie-Kark in Oosterholt-Scharmbeek.

Wapen

Dat Wapen von dat Dörp wiest op swarten Grund op en gollen Schildfoot en sülvern Draak de rood Füür spuckt mit rode Klauen un Steertspitz. En gollen Lanz stickt in’e Flank von’n Draak. Över’n Draak steiht en gollen Maand.

Draak un Lanz staht as Symbool för’n Hilligen Georg (=Jürgen) un de Maand för dat Woord Nee in’n Naam. De Barg in’n Schildfoot steiht för’n Abelhüttenbarg. Bevör de hüdige Oort grünnt worrn is, is de Ümgegend na dissen Barg nöömt worrn.

Dat Wapen hett de Grafiker Horst Scheffler utklamüsert un is an’n 3. September 1968 von’n Regerungspräsident von’n Regerungsbezirk Stood genehmigt worrn.

Oortsvörsteihers

Oortsbörgermeesters:

–2011: Klaus-Dieter Postels

Oortsvörsteihers:

2011–2016: Klaus-Dieter Postels
2016–: Heiko Pankoke

Kultur

In Nee Sankt Jürgen steiht en Denkmaal för de Fullenen ut’n Tweten Weltkrieg un bi de Zion-Kark in Worpsweed een för de Fullenen ut de beiden Weltkrieg’.

Verenen

De TSV Eiche Nee Sankt Jürgen is 1921 grünnt worrn.

Weertschop un Infrastruktur

Nee Sankt Jürgen hett en egene freewillige Füürwehr, de 1942 grünnt worrn is.

In Nee Sankt Jürgen hett de Conergy AG 2013 en acht Hektar groten Solarpark mit 14.000 Solarmodule un en Leistung von 3,4 MWp in Bedriev nahmen.^[12]

Verkehr

De Dörpstraat von Nee Sankt Jürgen is de Kreisstraat 15, de in’n Westen in de Landsstraat 153 münnt un in’n Süüdoosten an de Landkreisgrenz na’n Landkreis Rodenborg in de K 145 övergeiht un na Tarms löppt (dor över de K 114 an de L 133 anbunnen). De K 31 geiht von Nee Sankt Jürgen in’n Süden na Slussdörp. Över’n Hasenweg is de K 15 ok mit Adelsdorp un de Kreisstraten K 29 un K 36 verbunnen.

De L 153 föhrt in’n Noorden över Huttenbusch na Korlshöben un in’n Süden na Worpsweed un op Leendaal to. Dicht bi Nee Sankt Jürgen geiht von de L 153 na Oosten ok de L 153 af, de na Pennigbüttel bi Oosterholt-Scharmbeek un an de Bundsstraat 74 löppt.

De Opfohrt 16 Bremen-Noord op de Autobahn 27/270 liggt so 24 Kilometer in’n Süüdwesten von Nee Sankt Jürgen an de B 74. De Opfohrt 17 Dreeeck Bremen-Industriehavens op de Autobahn 27/281 liggt lieker wied in’n Süüdwesten.

De nächste Bahnhoff is so bi 17 Kilometer wied weg in’n Süüdwesten de Bahnhoff Oosterholt-Scharmbeek an de Bahnlien Bremen–Bremerhoben. Von 1911 bet 1978 hett dat ok op de Bahnlien Stood–Oosterholt Personenverkehr geven. De Bahnhoff Nee Sankt Jürgen leeg an’n Westrand von dat Dörp.