PROFILBARU.COM

Michele Scarponi (* 25. September 1979 in Filottrano; † 22. April 2017 ok dor) weer en italieensch Radrennfohrer.

Loopbahn

Scarponi fung sien Loopbahn 2002 bi dat italieensch Radsportteam Acqua e Sapone an. Nah en Johr is he to Domina Vacanze wesselt, mit dat he bi de Klassikern Flèche Wallonne un Lüttich–Bastogne–Lüttich up Platz 4 bzw. 7 keem. Bi de Freedensfohrt 2004 wunn he een Deelstreck un de Gesamtwertung.

2006 wurr Scarponi vun de Tour de France utslooten, wiel he ünner Dopingverdacht geraden weer. An‘ 8. Mai 2007, also een Dag nah dat Geständnis vun Ivan Basso, hett ok Scarponi inrüümt, dat he wat mit den Dopingschandaal Fuentes to doon harr. Buterdem hett he en umfaaten Opklären verspraaken. Vun den italieenschen Radsportverband FCI wurr he doruphen mit en 18 Maand lang düern Sparr beleggt, de bit to’n 15. November 2008 düern dee.^[1]

Nah Afloop vun sien Dopingsparr harr Scarponi sien bit dorhen gröttsten Spood, den Gesamtsieg bi de Feernfohrt Tirreno–Adriatico 2009, den he sück mit en Deelstreckensieg sekern dee. Bi den Giro d’Italia in dat glieker Johr hett he twee Deelstrecken wunnen.

2010 kunn he sien Sieg vun dat Vörjohr bi Tirreno–Adriatico nich wedderhalen, wiel hüm Stefano Garzelli up de letzt Deelstreck in en Tüschensprint de fehlen Sekunnen afnehmen dee un so tietgliek mit Scarponi leeg, so dat de beteren Deelstreckenplatzeeren Garzelli to‘n Gesamtsieger maaken deen.^[2] Bi den Giro is he to’n eersten Mal up eegen Reeknung fohren. Dor reck he een Deelstreckensieg un keem in de Gesamtwertung up Rang 4.

Den Giro d’Italia 2001 hett Scarponi 6:10 Minuten achter Alberto Contador afslooten, de aber nahderhen wegen en Dopingvergahn bi de Tour de France 2010 sparrt wurr,^[3] so dat Scarponi nahträglich Gesamtsieger wurr.

Enn‘ 2012 wurr Scarponi dör dat italieensch Olympische Komitee CONI för dree Maan bit to’n 1. Januar 2013 sparrt. De Sparr fung rückwirkend an‘ 1. Oktober 2012 an. He harr togeeven, dat he sück dör den in‘ italieenschen Sport levenslang as Trainer un Teamdokter sparrten Michele Ferrari in Trainingsfragen beraaden leet.^[4]

2013 is Scarponi to’n darten Mal up den veerten Gesamtrang bi den Giro d’Italia fohren. Bi de Tour de France een Johr later weer he en vun de Helper vun den Gesamtsieger Vincenzo Nibali.

An‘ 22. April 2017 wurr Scarponi wiels Trainingsfohrt in sien Gebortsoort Filottrano tödlich besehrt, as he frontal mit en Lütttransporter kollideeren dee, de Fohrer harr hüm nich sehn. Blots wenig Daag tovör harr he bi de Tour of the Alps mit de eersten Deelstreck sien letzt Radrennen wunnen.^[5]^[6]

Scarponi weer verheiraadt un harr twee Kinner.

Wat he schafft hett

2004

Gesamtwertung un een Deelstreck Freedensfohrt

2007

Gesamtwertung un een Deelstreck Settimana Internazionale

2009

Gesamtwertung un een Deelstreck Tirreno–Adriatico
twee Deelstrecken Giro d’Italia

2010

een Deelstreck Tirreno–Adriatico
Gesamtwertung un een Deelstreck Settimana Ciclistica Lombarda
een Deelstreck Giro d’Italia

2011

een Deelstreck Giro di Sardegna
een Deelstreck Tirreno–Adriatico
Gesamtwertung Giro del Trentino
Gesamtwertung Giro d’Italia^[3]

2013

GP Costa degli Etruschi

2015

Mannschapstietfohren Burgos-Rundfohrt

2016

Mannschapstietfohren Giro del Trentino
Mannschapstietfohren Burgos-Rundfohrt

2017

een Deelstreck Tour of the Alps

Teams

2002: Acqua & Sapone
2003-2004: Domina Vacanze
2004-2005: Liberty Seguros-Würth
2007: Acqua & Sapone-Caffè Mokambo
2008-2010: Androni Giocattoli-Serramenti PVC Diquigiovanni
2011-2013: Lampre-Merida
2014-2017: Astana (Radsportteam)

Weblenken

Michele Scarponi. Mehr Biller, Videos oder Audiodateien to’t Thema gifft dat bi Wikimedia Commons.

Enkeld Nahwiesen

↑ [1] 18 Monate Doping-Sperre für Scarponi, radsport-news.com, afropen an‘ 22. April 2017
↑ [2] Garzelli fängt Scarponi noch ab, radsport-news.com van‘ 16. März 2010, afropen an‘ 22. April 2017
↑ ^a ^b wayback=20121102135411 Alberto Contador found guilty of an anti-doping rule violation by the Court of Arbitration for Sport (CAS): Suspension of two years,tas-cas.org, 6. Februar 2012, afropen an‘ 6. Februar 2012, (englisch, PDF; 187 kB).
↑ [3] Milde Strafe für Scarponi nach Kontakt zu Doping-Arzt, rad-net.de van‘ 12. Dezember 2012, afropen an‘ 22. April 2017
↑ [4] Rad-Star stirbt bei Trainingsunfall, sport1.de van‘ 22. April 2017, afropen an den sülvigen Dag
↑ [5] Astana-Profi Scarponi bei Trainingsunfall getötet, rad-net.de van‘ 22. April 2017, afropen an den sülvigen Dag