PROFILBARU.COM

De Massenpanik up de Love Parade 2010 is an’n 24. Juli 2010 mank de Besökers vun dat Danzfestival “Love Parade” in Duisborg utbraken. De Panik speel sik af an’n Ingang vun dat Fest-Terrain. 21 Lüde sünd dor bi umkamen un 509 Lüde hefft dor wat bi afkregen un sünd verwunnt wurrn.^[1]

De Geschicht vörweg

De Love Parade is 1989 in Berlin to’n eersten Mol afholen wurrn. Vun dor af an hett se, mit Utnahme vun 2004, 2005 un 2009, jedet Johr statt funnen. Dör de Johre hen is dor dat gröttste Techno-Event vun de Welt vun wurrn. 2007 is dat Festival na dat Ruhrrebeet umtagen. Dor hett dat achternanner in Essen un in Düörpm statt funnen. 2009 möss de Love Parade afseggt weern, vunwegen dat de Stadt Baukem mit de grote Masse Besökers, de dor kamen schollen, nich torecht kamen konn. Dat weern in de Vörjohre jummers mehr as 1 Mio. Besökers ween, in dat Johr 2006 man bi 1,6 Mio.

Dat Ruhrrebeet weer 2010 Kulturhööftstadt vun Europa un de Love Parade in Duisborg harr en vun de Hööchtepunkte vun „Ruhr 2010“ weern schollt. Organiseert wurrn is de Sake vun den Bedriev „Lopavent GmbH“ vun den Unnernehmer Rainer Schaller. Dat Festival scholl sik afspelen up en vörmolig Iesenbahn-Gelänne mit 230.000 m² Grund.

Wat passeert is

Dat Unglück hett sik afspeelt an den Ingang vun dat Fest-Terrain. Dor konn een dör den Tunnel vun de Karl-Lehr-Straten henkamen. De Tunnel weer togänglich vun beide Sieten ut. Vun den Punkt ut, wo de Anloopwege tosamen lopen sünd, is en Padd na dat Festival-Terrain hoochgahn. Anners, as bloß man över düssen Padd konnen Besökers nich hen un ok nich weg vun dat Gelänne. Vunwegen, dat de Tunnel to small weer vör de unbannige Masse Minschen, güng dat al an’n Anfang vun dat Event nich hen un nich her.

Ok dat Terrain för dat Festival sülms weer to lüttjet för de unbannige Minschenmasse. Dor passen hoochut 250.000 Minschen rin, gegendes doch de Organisatschoon mit 1,4 Mio. Besökers rekent hett. So güng dat k up dat Terrain sülms an allerhand Stäen nich wieter.

De meisten Doden sünd bi düsse Trepp an'n Ingang umkamen

Gegen Klock 5 an’n Namiddag is dat Unglück passeert. De Polizei harr kort vördem dat Festival-Terrain slaten. De Lüde, de nich mehr rinlaten wurrn sünd, strömen nu torüch. Man vun de annere Kant her strööm de Tunnel jummers noch vull mit Minschen, de na dat Fest henwollen. De Tunnel weer vull prammst mit Lüde. Amenne versöchen Besökers, över Containers, Noodtrappen un Luudspreker-Masten ut de Minschenmasse rut to kladdern. Man dusende vun Minschen konnen nargens hen. De Hölpdeenste konnen gor nich henkamen. An de twee Ingänge vun den Tunnel sünd de Lüde upropen wurrn, se schollen na Huus gahn. Dat duer noch bit Klock 6 avends, ehr datt de eerste Hölp överhoop dör den Tunnel dörkeem. 15 Lüde sünd an de Stäe vun dat Unglück umkamen. Later, an’n sülvigen Dag sünd noch mol veer Minschen in’t Sükenhuus sturven un in de Dage dornah sünd noch mol twee dood bleven. Amenne weern dat denn tohopen 21 Lüde, de sturven weern. Se sünd all umkamen, weil se dood drückt wurrn sünd. 509 Minschen hefft anners wat afkregen un weern verwunnt.

Vunwegen, datt nich noch grötter Chaos utbreken scholl, is beslaten wurrn, dat Event nich slankweg to stoppen. So is vun allerhand Lüde wieter fiert wurrn, ofschoonst dor al Dode to beklagen weern.

Oppers

Mank de 21 Doden sünd tein Froenslüde un ölben Mannslüde ween. Dartein vun jem kemen ut Düütschland. De annern sünd ut de Nedderlannen, ut Australien, ut Bosnien un Herzegowina, China, Italien un Spanien kamen.^[2]

Wat achterna keem

Politikers, as de Bundskanzlersche Angela Merkel un de Bundspräsident Krischan Wulff hefft slank hören laten, datt se deep bedrapen weern vun dat Unglück un datt se dat leed doon dö för de Verwunnten un för de Angehörigen vun de Doden.

Kritiek

Al vörweg harr dat Fragen vunwegen de Sekerheit vun de Veranstaltung geven, sunnerlich dör de Polizei.^[3] Ok in dat Internet weer al vörweg Sprake dorvun, datt dor Chaos un en Katastroof vun kamen konn.^[4]. De Grünner vun de Love Parade, Dr. Motte, hett de Organisaters de schuld geven un hett vun en „Schandaal“ spraken.^[5] Lüde, de annere Festivals organiseern döen, hefft seggt, de Saak in Duisborg weer vun Amateurs anpackt wurrn un dor hannel sik dat um en Verbreken bi.^[6] Wolfgang Orscheschek, Viez-Baas vun de noordrhien-westfäälsche Polizei-Gewerkschaft, kritiseer, datt veel to wenig Platz för all de Minschen vörsehn weer, ok schollen Polizei un Füerwehr Bedenken över de Sekerheit utspraken hebben. Erich Rettinghaus, wat de Vörsitter vun desülvige Gewerkschaft is, meen, nu möss gründlich unnersöcht weern, wie dat to de Panik kamen konn un wat dat mit de Sekerheitskonzepte up sik harr, de hier handhaavt wurrn sünd.

Bannige Kritik hett dat geven an Börgermeester Adolf Sauerland vun de CDU. Gegen em is demonstreert wurrn, as he den Oort vun de Katastroof besöken dö un de Lüde, de dor ween sünd, hefft em utschimpt. Allerwegens warrt foddert, he scholl Bott geven un nich länger Börgermeester blieven. Man he meen, he harr keen Schuld an de Sake. He un ok de Organisater Rainer Schaller sünd bi den Troer-Goddesdeenst an’n 31. Juli in de Salvator-Karken vun Duisborg nich mit bi ween.^[7]

Afscheed

An’n 31. Juli 2010 is en Troer-Goddesdeenst in de Salvator-Karken in Duisborg afholen wurrn. Bundspräsident Wulff, de Präsident vun’n Düütschen Bundsdag, Norbert Lammert, Bundskanzlersche Merkel, Butenminister Westerwelle un bi 500 Troergäste sünd dor mit bi ween, dormank de Angehörigen vun de Doden. De Predigten sünd vun den Präses un EKD-Raatsvörsitter Nikolaus Schneider un vun den kathoolschen Bischop vun Essen, Franz-Josef Overbeck, holen wurrn. Na den Goddesdeenst hett de nee Ministerpräsidentsche vun Noordrhien-Westfalen, Hannelore Kraft, in de Karken noch en persönliche Anspraak holen. De Goddesdeenst is in 14 Karken in de Stadt un in dat Footballstadion vun den MSV Duisborg överdragen wurrn. Namiddags hett dat noch mol en Troermarsch na de Unglücksstäe hen geven.