Buschmann is 1970 in Hamborg boren un in Vosshusen opwussen.[2] Na sien Abitur an dat Gymnasium Vosshusen hett he en Lehr as Butenhannelskoopmann maakt. Na de Lehr hett he för verscheden Reedereen un in dat Supply-Chain-Management arbeidt.[3]
Politik
Von 1992 bet 1996 weer Buschmann Maat von de NPD. He weer Vörsitter von’n NPD-Kreisverband Horborg-Land un Schattmeester von’n neddersassischen Landsverband von de Jungen Nationalisten.[4]
2009 is he in de Deerschuulpartei intreden, na egen Angaven is he över Akschonen gegen dat Deerversöökslabor in’n Naveroort Mienenbüddel to de Deerschuulpartei kamen.[2][5] He sett sik ünner annern för en vegane Levenswies un en Verbaad von Massendeerhollung in.[5] Siet 2015 hett Buschmann hauptamtlich för siene Partei arbeidt, ünner annern as Generaalsekretär.[2]
För de Europawahl 2019 hett em siene Partei för den eersten Listenplatz nomineert. De Partei hett 1,4 Prozent von de Stimmen kregen un kreeg dormit een von de 96 düütschen Mandate, so dat Buschmann direkt in dat Parlament intagen is.[6]
Buschmann is na de Europawahl Maat von de Konföderale Frakschoon von de Vereente Europääsche Linke/Nordische Gröne Linke (GUE/NGL) in dat Europaparlament worrn. To düsse Frakschoon höört ünner annern ok de düütsche Partei De Linke. För de Frakschoon weer Buschmann Maat in’n Utschuss för Bueree un ländliche Entwicklung un in’n Petitschoonsutschuss.[7]
He is an’n 28. Januar 2020 ut de Frakschoon rut, nadem an’n 26. Januar dör en Artikel in dat Wochenblatt siene Vergangenheit in de NPD bekannt worrn is.[4] In en Stellungnahm hett he sik von dat, wo de NPD för steiht, afseggt.[8]
De Frakschoon hett em üm en Stellungnahm beden, en Utsluss ut de Frakschoon is he dör sien egen Uttridd tovörkamen. Buschmann hett aver seggt, dat he sien Mandaat liekers behollen will.[1][9][10]
_(cropped).jpg)
