Maria Hellwig (borene Neumaier; * 22. Februar1920 in Reit im Winkl; † 26. November2010 in Ruhpolding) weer en düütsche Singersche vun volksdömliche Musik, Moderatersche un Ünnerhollenskünstlersche. Se gell as de Verkörpern vun de düütschen volksdömlichen Musik slechthen vun wegen ehr Leder un ehr Kledaasch – tomeist is se in en Dirndl optreden.
Maria Hellwig weer as Dochter vun den Elektriker Heinrich Neumaier un sien Fro Maria boren. In’t Öller vun fief Johren hett se to’n eersten mol op de Bühne vun’t Buerntheater vun ehrn Heimatoort stahn. Na ehr Schooltiet hett se en Lehr as Verköpersche maakt, speel aver in ehr Freetiet Theater un hett ok Singünnerricht nahmen. Op de Bühne hett se ok ehrn eersten Ehmann Joseph Fischer drapen, de in’n tweeten Weltkrieg fallen is. Ut disse Eh stammt ehr Dochter Margot (* 1941), mit de se siet 1963 tomeist as Duo Maria un Margot Hellwig optreden is.
Vun 1948 bit to sien Dood 1996 weer se in tweete Eh mit Addi Hellwig verheiraat. 1948 weer se ok bi de Hamborger Volksoper anstellt, woneem se mehrere Rullen speelt hett, to’n Bispeel as Mi in de OperettDas Land des Lächelns. Mit ehrn Mann hett se dorna en Wannerthetaer grünnt, mit dat se eenige Johren ünnerwegens weer. Se weer denn vun Franzl Lang opdeckt un süng an’n Münchener Platzl. 1957 künn se ehr eerste Schallplaat opnehmen. Dorna kemen de eersten Engagements bi Rundfunk un Feernsehn, wodör se denn allgemeen bekannter worrn is.
In Reit im Winkel hett se 1964 tosamen mit ehrn Mann dat Restaurant-Café Zum Kuhstall apenmaakt, dat wohrhaftig in en ollen Kohstall ünnerbröcht weer. Anfang vun de 1970er Johrenhett se veer Folgen vun de Sendung Musik macht Laune modereert un kreeg dorna af 1973 ehr egene Sennenreeg Die Musik kommt, de an’n 6. Oktober to’n eersten mol utstrahlt worrn is. Mit de Reeg is se düütschlandwiet bekannt worrn. To Anfang weern blots en poor Folgen plaant, man se harr dormit so veel Spood, dat de Reeg opletzt teihn Johren lang produzeert weer. Bito hett se wietere Sennen in’t ZDF modereert, as Die Fahrt ins Blaue oder Früh übt sich. Vun 1984 bit 1991 hett se mit ehr Dochter Margot bi RTL de Sennen Heimatmelodie modereert, folgt vun Servus, Grüezi und Hallo bit 1993.
In’t Johr 1986 hett se mit ehr Dochter mit den Titel Der Kaiser von Tirol för Düütschland an’n Grand Prix vun de Volksmusik 1986 deelnahmen. Nipp un nau twintig Johren later weern de beiden noch en tweet mol bi den Wettstriet mit dorbi.
Mit tallrieke Tourneen weer Maria Hellwig in meist all Eerddeelen ünnerwegens.[1][2] Toletzt weern Maria un Margot Hellwig bit Mai 2008 mit dat Frühlingsfest der Volksmusik op grote Tournee.[3]
As ehr Ehmann doodbleven weer, hett se dat Restaurant-Café an ehrn Kollegen Thomas Berger afgeven. Bit to ehrn Dood weer se noch regelmatig aktiv un in verscheden Feernsehsennen to sehn.
Ehrungen
In’n Verloop vun ehr Loopbahn hett sik Maria Hellwig mehrere goldene Schallplaten verdeent.. Se is butendem mit de Hermann-Löns-Medaille in Bronze, Sülver, Gold un Platin uttekent worrn, mit den Grönen Löwen vun RTL, mit dat Edelweiß (1992) un mit den Bambi. 1993 hett se vun ehr Heimatgemeen Reit im Winkl den Golden Ehrenring verleht kregen. För ehr Levenswark is se 1998 mit de Kroon vun de Volksmusik ehrt worrn.
In Suhl is se an’n 20.Dezember 2009 bi de Sendung Es ist so schön ein Musikant zu sein – Die Herbert-Roth-Gala vun’n MDR mit den „Herbert-Roth-Traditschoonspries“ för ehr Levenswark uttektn worrn.[4] An’n 9. Januar 2010 kreeg se nochmol en Kroon vun de Volksmusik för ehr Levenswark.[5]
Spoodrieke Titels
1957: Die Nachtigall vom Zillertal
1958: Erzherzog-Johann-Jodler
1959: Der Geburtstagsjodler
1963: Der Feierabendjodler
1965: Karwendellied
1967: A Jodler zum Juchzn
1970: Ferienpolka
1973: Auf geht’s Leut – die Musik kommt
1974: Jung muss man bleib’n, wenn man älter wird
1974: Das Kufsteiner Lied
1975: Das Alphorn ruft vom Berge
1977: Das Edelweiß vom Wendelstein
1977: O du mein Edelweiß
1977: Servus, Grüezi und Hallo
1977: Mei is dees a schöner Tag
1978: Die Musikanten sind wieder da (mit Freddy Breck)
