Mannschopssport

Twee Mannschoppen staht sik bi’n American Football gegenöver

En Curling-Mannschop hett veer Liddmaten

Kinner bi’t Football-Spelen

As Mannschopssport warrt en Sport betekent, de nich vun enkelte Personen utöövt warrt, man vun struktureerte Gruppen (Mannschoppen), de in en Wettstriet gegenenanner antreden doot. Disse Oort, Sport to bedrieven warrt ok Mannschopsspeel nöömt, wat sik vör allen dör sien gröttere Differenzeeren vun en Parteienspeel ünnerscheden deit.

Egenorden

Tomeist hannelt sik dat bi’n Mannschopssport üm kumplexe Sportorden (faken Ballsportorden), bi de dat nich üm en eenfachen Vergliek vun Kräften geiht, in’n Sinn vun „höger, gauer, wieter“. In’n Gegensatz to’n Individualsport kummt dat bi Mannschopssportorden ok veel op dat Tosamenspeel un op de Taktik an.

Wiel en Wettkamp oder Speel, warrt de Liddmaten vun een Mannschop tomeist dör gemeensome Markmolen as de Klöör vun de Kledaasch kenntekent, to’n Bispeel dör dat Drägen vun en Trikot. De enkelte Speler warrt faken dör en Tall op’n Rüch oder op’n Buuk to kennen geven. Deelwies warrt ok buten vun Wettkämpen Kleedaasch dragen, welke de tohöörigkeit to en Mannschop wiest, as to’n Bispeel Collegejacken in’n US-amerikaanschen Mannschopssport. Un veelfach warrt Trikots nich blots vun Spelers dragen, man ok vun de Fans vun een Mannschop, de dormit jemehr Sympathie to’n Utdruckt bringt. Wettkämpen in’n Mannschopssport sünd tomeist in Ligen un Speelklassen organiseert, in de denn Meesterschoppen utdragen waart.

Man, dat gifft ok Sportorden, de an sik as’n Individualsport ansehn warrt, in de aver ok Spelers as Team optreden doot un/oder in de dat Varianten as Dubbel gifft. Bispelen dorför sünd Sportoorden as Tennis, Badminton, Dischfootball un annere. Bispelen för Enkeltsportoorden, de ok as Mannschop bedreven warrt, sünd Schach, Skat oder ok Loopsport (Staffeln).

Ünnerdeelen

Dat Ünnerscheeden vun Mannschopssport un Individualsport geiht nich jümmer so eenfach, vun wegen dat enkelte Sportoorden ünnerscheedlich tosamenstellt sünd. Man kann de folgen Orden vun Mannschopssport scheden:

Reinen Mannschopssport

Basketball is’n reinen Mannschopssport

Dorto tellt Sportorden, de blots as Mannschopssport utföhrt warrn kann. De Tall vun de Spelers in de Mannschop is fastleggt. Üm mit Spood an Turneren oder Meesterschoppen deelnehmen to künnen, bruukt Mannschoppen mitünner en Kader, de deels veel grötter is as de Tall vun Spelers, de to Anfang antreden doot. To’n Bispeel besteiht en Football-Mannschop ut teihn Feldspelers un een Doorwart. Bi en Speel in Wettkamp drööft ut’n Kader höchstens dree Utwesselspelers in’n Tuusch gegen annere Spelers in de Mannschop nahmen warrn. Grund dorför kann to’n Bispeel en Wessel vun de Speeltaktik wesen oder ok dat en Speler besehrt oder beet is.

Mannschoppen ut blots twee Personen sünd to’n Bispeel bi’n Danzsport oder bi’n Strandvolleyball begäng. Dor gifft dat ok keen Utwesselspelers: de beiden Partners sünd vunenanner afhangig. Wenn een vun de beiden utallt, is de Mannschop nich mehr in de Laag, den Wettkamp to bestrieden.

Formatschonen

Formatschoonsdanzen

Rodern in en Veerer-Formatschoon

Bi annere Sportorden, de in ünnerscheedliche Formatschonen speelt warrt, in de kooperativ tohopen speelt warrt, as bi’n Tennis oder Pétanque. Wiel bi’n Tennis vör allen enkelt speelt warrt, gifft dat bi’n Pétanque blots wenige Turneren för de Enkeltformatschoon „Tête à tête“ (de nich so vel Anhangers hett). För den Spood is bi disse Formatschonen wichtig, dat se en gemeensome Taktik, Tosamenspeel un Afspraken hebbt.

Ok bi’t Rodern gifft dat ünnerscheedliche Formatschonen, as Eener, Twee’er, Veerer oder Achter. Bi den Sport kummt dat vör allen op dat gliekmatige Bewegen un en gemeensome Renntaktik an. Dat gellt so ok ruchweg för dat Mannschopstietfohren in’n Radsport, wiel dat bi Radsport-Rundfohrten för de Mannschopsliddmaten ünnerscheedliche Opgaven gifft.

Staffeln

In eenige Sportorden warrt Staffeln maakt, de sik gegenöver de reine Mannschopsweerten dör en gemeensome Renntaktik afgrenzen laat as ok dör’t Inhollen vun sünnere Regeln för’n Wessel.

Mannschopsweerten

Sünners för den Liga-Bedrief gifft dat in vele Sportorden Mannschoppen, de ut Enkeltspelen un mööglicherwies Formatschonen bestaht. De Resultaten warrt denn tosamentellt.