De Mairie Winsen weer in de Franzosentied (1810 bet 1813) een von de dree Mairien, in de de Kanton Winsen indeelt weer. De Seet weer in Winsen. Se harr 3169 Inwahners.[1]
Historie
De Ümgegend von Winsen hett vör de Franzosentied to dat Amt Winsen in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Winsen een von de teihn Mairien in’n Kanton Winsen von’n Distrikt Horborg, Departement von de Nedderelv.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Winsen weer nu een von de dree Mairien in’n Kanton Winsen, Distrikt Lümborg, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to söss Mairien höört harrn: de Mairie Winsen ut’n Kanton Winsen un de Mairien Tönnhusen, Handörp, Wittörp, Radbrouk un Bossel ut’n Kanton Bewick.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd
Dor hebbt düsse Öörd tohöört:
- Kaiserriek Frankriek:[1]
- Winsen mit Sankt Jürgen (1340 Inwahners), Tönnhusen, Nettelbarg (245), Radbrouk (241), Rottörp (106), Sangenstää (50), Handörp (456), Kluus (6), Wittörp (102), Bossel (292), Luhdörp (229), Reidörp (102)
Vondaag sünd düsse Öörd Deel von de Stadt Winsen un de Samtgemeen Bewick.
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 61
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 64
