Costner is de Söhn vun en irischstämmige Mudder, Sharon Rae Tedrck, un en düütschstämmigen Vadder, William Costner. In sien Schooltiet weer Cosnter Liddmaat vun‘n Karkenchor un schreev blangeto Gedichten. He gell as en Dagdrömer un Butensieter. Een vun sien gröttsten Hobbys weer jümmer de Sport. In de Jöögd hett he Basketball, Baseball un American Football speelt, later hett sik op in‘t Sport versöcht.
Vun 1973 an hett he an fief Avenden in de Week Schauspeelünnerricht nahmen. Dat College hett he 1978 in‘t Fack Business (so veel as Bedrievsweertschop) afslaten. Na sien Studium an de California State University hett he en Marketingberoop in Orange County annahmen un sien Leefste ut de Jöögdtiet, Cindy Silva, heiraadt. Bi en tofallig Drapen kreeg he vun Richard Burton de Raatslag, sik op de Schauspeleree to kunzentreeren, wenn he dat in den Beroop to wat bringen wull. Costner hett dorophen sien Beroop opgeven, is na Hollywood togen un höll sik dor toeerst as Lastwagenfohrer, Hoochseefischer un Busfohrer bi Stadtrundfohrten över Water. Sien Fro is as Schneewittchen in Disneyland optreden.
Sien Filmdebüt geev Costner 1974 mit de Softsex-Kummedie Sizzle Beach, U.S.A., de aver eerst 1986 rutbröcht worrn is, as Costner al lang en Star weer. De Dreiharbeiten weern rein gro nix för em, so dat he sik vörnahmen hett, de Schauspeleree blieven to laten, wenn he keen annere rullen finnen künn. Eerst Anfang vun de 1980er Johren keem he mit lüttere Rullen wedder na‘n Film torüch. Sien Szenen in de Tragikkummedie The Big Chill (1983) vun Lawrence Kasdan sünd rutsneden worrn, man Kasdan hett den jungen Costner 1985 denn en Hööftrull in den WesternSilverado geven. Sien Speel un sien akrobaatschen Rietkünsten hebbt Indruck maakt un kemen bi de Tokiekers un bi de Kritikers goot an.
Sien Dörbrook to‘n Star harr he 1987 in den Film The Untouchables vun Brian de Palma. In‘t glieke Johr hett he den spoodrieken ThrillerNo Way Out dreiht. Twee Johr later harr he en wieteren Filmspood mit den märkenhaften Film Field of Dreams, över en Buern, de mit den Bo vun en Baseball-Stadion in sien Maisfeld de verleden Tieten torüchbeswört. To disse Tiet hett de Kritik Costner, de in sien Rullen jöögdhaften Charme un fasten Willen utstrahlen de, as en „ne‘en Gary Cooper“ fiert.
Op den Höögdpunkt vun sien Popularität hett Costner 1990 de Hööftrull in Dances with Wolves övernahmen un weer togliek ok Speelbaas un Produzent vun den Film. De meher as dree Stünnen duern Film is en internatschonalen Spood worrn, liekers de Fackwelt dat nich glöövt harr. De Film weer twölf mol för den Oscar nomineert un hett sövern dorvun wunnen. Bit Mitt vun de 1990er Johren keem denn meist een Spood na’n annern mit Filmen as Robin Hood: Prince of Thieves, JFK, Bodyguard oder Perfect World.
De Verfilmen vun’t Leven vun Wyatt Earp vun Lawrence Kasdan mit Costne in de Titelrull weer 1994 teemlich mau. Een Johr later hett Costner den Science-Fiction-Film Waterworld produzeert, denn he nan Striet mit den Speelbaas Kevin Reynolds to’n Deel ok sülvst inszeneert hett. De Film weer dormols de düerste Film, de je dreiht worrn is, hett aver 264 Millionen US-Dollar inspeelt.[1] De Film hett aver in de USA mit 88 Miollionen US-Dollar teemlich wenig inspeelt un gellt dor nu as finanziellen Flop. Twee Johr later hett Costner nochmol alles op een Kort sett, üm as Schauspeler, roduzent un Speelbaas en vergliekswies düre Mischen ut Western un Science-Fiction to dreihn. De Film The Postman is aver finanziell meist spektakulär na achter los gahn un hett Costner butendem noch de Golden Himbeer för den slechtsten Film vun’t Johr inbrocht.
Grode Filmen mit Costner sünd dorna nich mehr kamen. Liekers bleev he mit Hööftrullen in Filmen as Message in a Bottle, Thirteen Days oder Open Range wieter to sehn un bi sien Smack. 2007 hett he mit sien Rull as Regenmöörder in den Film Mr. Brooks överrascht. Costner weer in de düütschen Versionen tomeist vun Frank Glaubrecht synchrooniseert.
Costners Eh mit sien Fro Cindy Silva is 1994 na 16 Johren scheedt worrn. De beiden hebbt tosamen dree Kinner. Ut en korten Affär mit Bridget Rooney stammt sien Söhn Liam. Siet 2004 is he mit de düütschen Handtaschenmakersche Christine Baumgartner verheiraadt. De beiden hebbt tosamen twee Kinner. 2007 hett Costner mit Ünnerstütten vun sien Fro en Country-Grupp grünnt, de den Naam Modern West hett. Vun jem is bit hüüt een Album (Untold Truth) rutkamen.
Kevin Costner heer al faken för Filmpriesen un Utteken nomineert. Tosamen weer he för mehr as 70 Priesen vörslahn. Uttekent worrn is he bit hüüt (Dezember 2013) mit 34 Filmpriesen, as to’n Bispeel:
1990: mit den NBR Award in de Kategorie Best Speelbaas för Dances with Wolves.
