Keernborg (hoochdüütsch Kettenburg) is en Dörp in de Gemeen Visselhöövd in’n Landkreis Rodenborg, Neddersassen. Binnen de Gemeen billt de Oort tohoop mit Fahlbeek, Griemen un Hilligensehl en polietsche Oortschop.
Geografie
De Oort liggt in de Lümbörger Heid. Dicht bi Keernborg flütt de Lehrde langs. In’n Oosten liggt dat Naturschuulrebeed Oddinger Ossenmoor.
De Naveröörd sünd Visselhöövd in’n Noorden, Riepholm un Oddingen in’n Noordoosten, Meyerhoff in’n Oosten, Ohrsen un Jarl in’n Süüdoosten, Hilligensehl in’n Süden, Fahlbeek, Griemen, Stellich un Bleckwedel in’n Süüdwesten un Wehnsen, Jeddingen un Nindörp in’n Noordwesten.
Historie
Dat Dörp geiht trügg op dat Good Keernborg. Al in dat 12. un 13. Johrhunnert hett en Borganlaag bestahn. 1345 is de Anlaag to en Waterborg utboot worrn. Borg un Good weren Stammseet von de Familie von de Kedenborg.
In’n Eersten Weltkrieg sünd teihn Soldaten ut Keernborg fullen oder vermisst.[1] An’t Enn von’n Krieg is de Oort an’n 18. April 1945 von de Briten innahmen worrn.
Verwaltungsgeschicht
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Griemen in’n Kanton Wasra höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Stellich in’n Kanton Wasra.
De Oort hett vör 1852 to dat Gericht Cordingen in dat Amt Rethen tohöört un denn von 1852 bet 1885 to dat Amt Fambossel. Na 1885 weer dat in’n Kreis Fambossel. 1932 is dat för korte Tied Deel von’n Kreis Soltau-Fambossel worrn, de 1933 wedder oplööst worrn is, so dat de Oort to’n Kreis Fambossel höört hett.
De Oort billt von öllers mit Griemen un Fahlbeek de Gemeen Keernborg. Dat Good Keernborg hett aver eerst von 1928/1929 af an to düsse Gemeen tohöört. Vörher weer dat en egen Goodsbezirk. De Gemeen Keernborg is an’n 1. März 1974 mit de Gemeenreform in Neddersassen Deel von de Gemeen Visselhöövd worrn. Dorbi is de Oort ut’n Landkreis Fambossel in’n Landkreis Rodenborg wesselt. Sietdem billt Keernborg binnen de Gemeen en Oortschop mit egen Oortsvörsteiher.
Inwahnertall
| Johr |
Inwahners
|
| 1791-00-001791[2] |
7 Füürsteden
|
| 1812-00-001812[3] |
64
|
| 1824-00-001824[4] |
8 Füürsteden
|
| 1848-00-001848[5] |
106 Lüüd, 17 Hüüs
|
| 1871-12-011. Dezember 1871[6] |
129 Lüüd, 20 Hüüs
|
| 1885-12-011. Dezember 1885[7] |
106 Lüüd, 16 Hüüs
|
| 1905-12-011. Dezember 1905[8] |
97 Lüüd, 14 Hüüs
|
| 1910-12-011. Dezember 1910[9] |
130
|
| 1925-00-001925[10] |
69
|
| 1933-00-001933[10] |
201
|
| 1939-00-001939[10] |
265
|
Religion
Keernborg is evangeelsch-luthersch präägt un höört to dat Kaspel von de Johannis-Kark in Wasra.
För de Kathoolschen weer von 1852 bet 1960 de Kapell op Slott Kedenborg tostännig. Nu is de Hart-Jesu-Kark in Visselhöövd tostännig, de siet 1. August 2004 to de Karkengemeen St. Maria von’n hilligen Rosenkranz in Wasra tohöört.
De Karkhoff Keernborg liggt in’n Noordoosten von’n Oort.
Oortsvörsteihers
- opstunns (Stand 2018): Pamela Helmke
Kultur
Gedenktafeln för de Fullenen ut’n Eersten Weltkrieg hängt in Wasra in de Kark.
Verenen
De Schüttenvereen Keernborg is 1923 grünnt worrn.
Weertschop un Infrastruktur
Keernborg hett en egene freewillige Füürwehr, de 1939 grünnt worrn is.
Verkehr
Dör Keernborg löppt de Landsstraat 161, de in’n Noorden na Visselhöövd an de Bundsstraat 440 föhrt un in’n Süden över Ebben na Wasra an de B 209. De Kreisstraat 245 löppt in’n Noordwesten na Nee-Wehnsen un de K 244 in’n Süüdwesten na Stellich.
De nächste Autobahn is de Autobahn 27 (Afsnidd Bremen–Wasra). De Opfohrt 27 Wasra-West liggt so 13 Kilometer in’n Süden von Keernborg an de B 209.
De nächste Bahnhoff is so bi veer Kilometer wied weg in’n Noorden de Bahnhoff Visselhöövd an de Bahnlien Ülzen–Langwedel.
Scholen
De Kinner ut Keernborg gaht na de Grundschool Jeddingen. Bet 1969 harr de Oort en egen Volksschool. In dat Johr sünd de Schölers na de Middelpunktschool in Visselhöövd wesselt. Later sünd se na Jeddingen wesselt.
- ↑ Onlineprojekt Gefallenendenkmäler
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 126
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 115
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 330
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 102
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 90
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 99
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 48
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
