John Quincy Adams weer de Söhn van de 2. Präsident van de USA, John Adams. He hett Juristeree in Leiden in de Nedderlannen studeert, hett sien Afslott 1787 aber an dat Harvard College in Massachusetts makt. Dornah hett he eerst as Afkaat in Boston, Massachusetts, arbeit.
Aber al bold wurr he för de diplomaatisch Deenst insett. 1794 wurr Adams to’n Botschafter in de Nedderlannen beropen, 1796 weer he Botschafter in Portugal un 1797 in Preußen.
1802 wurr Adams in de Senat van Massachusetts wählt. In dat sülvige Johr hett he denn ok noch för een Seet in Repräsentantenhuus van de USA kandideet, is aber nich wählt wurrn. 1803 is he denn för de Föderalisten bi de Wahl to’n US-Senat antreden und wählt wurrn. 1808 is he van ditt Amt torüchtreden, wiels he sük een halv Johr vörher mit de Föderalisten in de Plünn kregen harr.
He is denn weer in de diplomaatisch Deenst torüchgahn. Van 1809 bit 1814 weer he Botschafter in Russland un van 1815 bit 1817 Botschafter in Grootbritannien. He gehör aber ok 1814 de Kommiss’schoon an, de de Freedenverdrag van Gent tüschen de USA un Grootbritannien uthannelt hett.
Van 1817 bit 1825 weer Adams Butenminister van de USA ünner Präsident James Monroe.
Bi de Präsidentenwahl van 1824 geev dat een Besünnerheet: Nümms van de Kandidaten kunn de absolute Mehrheit van de Wahlmännerstimmen kregen. Denn hebbt se de Wahl an dat Repräsentantenhuus wieder geben, de denn Adams wählt hett, wat överraschen de, wiels sein Gegner Andrew Jackson mehr Stimmen harr. Nah veer Johr is he denn bi de Versöök van der Wedderwahl aber doch van Jackson aflöst wurrn.
Sien Präsidentschopp
He hett een Politik levert ohn groode Höhepunkte un sien Amtstiet weer glück- un glanzlos. Blots een paar Pläns för Iesenbahn- un Kanalprojekten (Eriekanal, Illinois Waterway, Baltimore un Ohio Railroad), sünd bekannt bleben.
Adams weer de eerste Präsident, de een Frau ein Interview geben hett: Se harr hüm, as he in een Floot baad hett, de Klamotten klaut un hett hüm de blots för een Interview torüch geben.
Nah de Präsidentschopp
He wurr twaars nich as Präsident wedder wählt, aber he hett sük nich van de politisch Böhn toruch trucken. 1831 is he för de Demokraten-Republikaner in Repräsentantenhuus wählt un bit to sien Doot bleben. He weer dor Vörsitter van de Wertschopputschuss, Utschuss för Indianerfragen un för Butenangelegenheiten.
1834 wull he Gouverneur van Massachusetts wurrn, wat aber nich klappt hett. 1841 weer he ok noch mal as Afkaat in Deensten. De Slaaven van dat spaansch Slaavenschipp La Amistad, harrn tegen de Besatzung meutert un hebbt dat schafft, in de USA to lannen. Vör dat Böverste Gericht van de USA (Supreme Court) hett he de Slaaven verteedigt. So sünd de nich nah Spanien utwiest wurrn sondern kunn as free Minschen weer nah Huus gahn.
Adams is an een Slaganfall stürben. Sien Söhn Charles Francis Adams, Sr. un ok sien Enkelkind weern later henn Kandidaten för de Viezpräsident van de USA.
Literatur
Paul C. Nagel: John Quincy Adams : A Public Life, A Private Life. – New York : Knopf, 1997
Robert Remini: John Quincy Adams. – New York : Times Books, 2002
