Boßdorf is 1877 as Söhn vun den Oberpostschaffner Friedrich Boßdorf in Wiesenborg boren. He güng dor ok na Volksschool, ehrder he mit siene Familie na Hamborg keem. He hett 1896 en Lehr op Telegrafenassistent bi dat Postamt in Basbeek anfungen. Ok Däänsch un Sweedsch hett he dor lehrt. 1899 hett he sien Fro kennenlehrt. Se harr dat dull mit Spökenkraam. Ok Boßdorf hett sik nu veel mit Astrologie un Telepathie uteensett. In disse Tiet füng he ok mit dat Schrieven an, toeerst mit hoochdüütsche Saken. Aver sien Intress för Skandinavien hett em ok siene plattdüütsche Mudderspraak negerbröcht. Boßdorf füng dat Schrieven op Platt an. Toeerst man blot enkelte Arbeiden.
Sien Arbeit weer hart för em, he dee an Rückenmarkschwindsucht leiden. He is 1915 bi de Arbeit tohoopbraken un kunn nich mehr. Sien Krankheit weer so swoor, dat he 1917 in Rohestand güng. Nu füng he för dull dat Schrieven an. Siene Warken kemen nu Slag op Slag un hebbt em veel Rohm inbröcht. Boßdorf is 1921 in Hamborg vun siene Krankheit doodbleven un is op’n Karkhoff Ohlsdörp begraven.
Boßdorf gellt tohoop mit Fritz Stavenhagen as Begrünner vun dat plattdüütsche Drama. Besünners dat Wark vun den sweedschen Schriever August Strindberg hett op Boßdorf inwarkt.
In Cuxhoben un in Wiesenborg sünd Straten na em nöömt un in Kiel de Hermann-Boßdorf-Weg.
Hermann Boßdorf: 1877-1921. rutgeven vun Friedrich W. Michelsen, Arbeitsgemeinschaft Niederdeutsche Tage in Hamburg, Hamborg 1977
Carl Budich: Boßdorf als Lyriker und Balladendichter. Dissertatschoon, Hamborg 1927
Heinrich Detjen: Hermann Boßdorf als Dramatiker. Pröpper, Hamborg 1936
Albrecht Janssen: Hermann Boßdorf. Der Mensch, das Werk, der Dichter. Hermes, Hamborg 1927
Willy Krogmann: Die Jugendgeliebte. Ein unbeachtetes Motiv im Schaffen Hermann Boßdorfs. Hermes, Hamborg 1948
Johann Tietjen: Der dichterische Gebrauch der neuniederdeutschen Sprache im Drama anhand der plattdeutschen Dramen von Stavenhagen und Boßdorf. Dissertatschoon, Hamborg 1949
