De Oort hett vör 1852 to de Amtsvaagdie Amelkusen von dat Amt Winsen tohöört un denn bet 1885 to dat Amt Soltau. Na 1885 weer dat in’n Kreis Soltau. 1977 is dat Deel von’n Landkreis Soltau-Fambossel worrn, de 2011 den ne’en Naam Landkreis Heidkreis kregen hett.
De Oort hett fröher tohoop mit Ebendörp en Buurschop billt. De beiden Öörd sünd 1852 aver all beid egene Gemenen worrn. De Gemeen Hörpel is an’n 16. März 1974 mit de Gemeenreform in Neddersassen Deel von de Gemeen Bissen worrn. Sietdem billt Hörpel binnen de Gemeen en Oortschop mit egen Oortsvörsteiher.
Hörpel is evangeelsch-luthersch präägt un höört to dat Kaspel von de Antoniuskark in Bissen. In’n Stried üm en Union twüschen evangeelsche un reformeerte Kark hett 1874 en Deel von de Inwahners en Freekerk grünnt, de St.-Pauli-Kerk. De Kark weer toeerst in en Schaapstall ünnerbrocht un hett sik 1908/1909 en egen Karkengebüüd boot.
Hörpel hett een egen Kerkhoff mit een egen Kapell an de Straat na Döhl.
Oortsvörsteihers
opstunns (Stand 2018): Detlef Buchheister
Kultur
In Hörpel steiht en Denkmaal för de Fullenen ut de twee Weltkrieg’.
Weertschop un Infrastruktur
Hörpel hett en egene freewillige Füürwehr, de an’n 23. Juli 1938 grünnt worrn is.
Verkehr
Dör Hörpel löppt de Landsstraat 212, de in’n Noordoosten över Ebendörp, Äästörp un Garlstörp na Toppenstää un Wulfsen geiht un in’n Süüdwesten över Volgern un Bossel na Bissen. Lüttjere Straten loopt na Stimbeck un Döhl.
De nächste Autobahn is de Autobahn 7 (Afsnidd Hamborg–Hannover), de direkt an dat Dörp langslöppt. De Opfohrt 42 Ebendörp liggt so veer Kilometer in’n Noordoosten von Hörpel an de L 212.
De nächste Bahnhoff is so bi 18 Kilometer wied weg in’n Noordwesten de Bahnhoff Wintemaur an de Heidbahn. Von 1906 bet 1970 hett dat ok Personenverkehr op de Bahnlien Winsen–Hützel geven. De Bahnhoff Ebendörp-Hörpel leeg en beten in’n Oosten von’n Oort.
Scholen
Fröher harr Hörpel en egen Volksschool. Vundaag gaht de Kinner na Bissen op de Grund- und Hauptschool.
↑Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 101
↑Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 152
