De Distrikt Lümborg (oder Arrondissement Lümborg) weer as Distrikt en Verwaltungsrebeed in de Franzosentied (1810-1813). De Seet weer Lümborg. Ünnerpräfekt von’n Distrikt Lümborg von 1811 bet 1813 weer Claude-Hyacinthe-Félix Barthélemy.
Historie
Dat Rebeed hett vörher to dat Kurförstendom Bruunswiek-Lümborg höört.
An’n 1. März 1810 hett de König von dat Königriek Westfalen, Hieronymus, kund daan, dat dat Kurförstendom Deel von sien Königriek warrt. Westfalen weer en Vasallenstaat von dat Franzöösche Kaiserriek, dat siet 1803 dat Kurförstendom besett hollen harr.
Binnen Westfalen hett dat Rebeed von’n Distrikt Lümborg to de Distrikte Lümborg un Horborg in dat Departement von de Nedderelv tohöört. To’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Distrikt Lümborg weer nu een von de veer Distrikte, ut de dat Departement von de Elvmünnen tohoopsett weer.
1813/1814 sünd de Franzosen slahn un dat Rebeed befreet worrn. Dat Kurförstendom Bruunswiek-Lümborg is as Königriek Hannover wedder herstellt worrn un de ole Stand von vör 1810 weer wedder dor.
De Distrikt harr 65.981 Inwahners un weer indeelt in acht Kantons:
