Brillit is en Dörp in de Gemeen Gnarrenborg in’n Landkreis Rodenborg, Neddersassen. Blangen Brillit sülvs höört ok de Oortsdelen Hasselhorst, Franzhorn un Brillitermoor to Brillit.
Geografie
Brillit liggt op de Geest an’n Rand von dat Düvelsmoor.
De Naveröörd sünd Basdaal in’n Noorden, Öös in’n Noordoosten, Oosterweed un Langenhusen in’n Oosten, Rööfhorst, Gnarrenborg un Kuhs in’n Süden, Ooldwist in’n Westen un Volkmarst in’n Noordwesten.
Historie
Brillit kummt 1500 in dat Vörder Register toeerst in de Oorkunnen vör. De Oord is aver woll al düüdlich öller. De Naam warrt afleidt von Breden Liet. En Liet weer en Afhang, so as de Afhang von de Geest na dat Düvelsmoor hen.
1824/1825 weer Brillit een von de Meetpunkte von de Gaußsche Landsopnahm von Carl Friedrich Gauß. Gauß hett do ok en Tied mit Meetarbeiden in Gnarrenborg un Brillit tobrocht. En Utsnidd von dat Meetnett weer op’n 10-Mark-Schien afbillt, de von 1991 bet 2001 in Ümloop weer (Borgeld von de Düütsche Mark).
1929 is de Oort Rööfhorst Deel von de Gemeen Brillit worrn.
Brillit is an’n 8. April 1974 bi de Gemeenreform in Neddersassen mit de Gemeen Gnarrenborg tohoopleggt worrn.
Inwahnertall
| Johr |
Inwahners
|
| 1824-00-001824[1] |
9 Füürsteden
|
| 1848-00-001848[2] |
93 Lüüd, 18 Hüüs
|
| 1910-12-011. Dezember 1910[3] |
247
|
| 1925-00-001925[4] |
371
|
| 1933-00-001933[4] |
515
|
| 1939-00-001939[4] |
518
|
| 2005-12-3131. Dezember 2005 |
948
|
| 2008-12-3131. Dezember 2008 |
940
|
| 2011-12-3131. Dezember 2011[5] |
922
|
Religion
Brillit is evangeelsch-luthersch präägt un höört to dat Kaspel Karkwist. Siet 1963 gifft dat in Brillit en Gemeenhuus, dat ok as Kark bruukt warrt. To dat Gemeenhuus höört en Klockentoorn.
För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.
De Karkhoff von Brillit liggt an de Franzhorner Straat.
Oortsvörsteihers
Wapen
Dat Wapen von Brillit wiest op grönen Grund en sülvern Spitz. Op de Spitz is en Klockentoorn in swart to sehn. Vörn blangen de Spitz en sülvern Haal un achtern blangen de Spitz en sülvern Kleverbladd.
De Toorn is de Klockentoorn von dat Gemeenhuus in Brillit.
Kultur
Museums
Brillit hett en Kartuffelmuseum.
Weertschop un Infrastruktur
Brillit hett en egene freewillige Füürwehr.
Verkehr
Brillit liggt an de Kreisstraat 104, de in’n Oosten na Fahrendörp/Klenkendörp/Langenhusen an de Kreisstraat 102 ran geiht un in’n Westen mit de Bundsstraat 74 verbunnen is. Ans geiht noch na Süden to en Straat na Gnarrenborg.
Scholen
Brillit hett en Kita. De Kinner gaht na de Grundschool Klenkendörper Möhl in Oosterweed, de 1967 inricht worrn is.
Literatur
- Michael Ehrhardt: Brillit: Osterwede, Franzhorn, Rübehorst, Hasselhorst, Brillitermoor, die Geschichte des Dorfes und seiner Ortsteile. 1995
- ↑ C. H. Jansen: Statistisches Handbuch des Königreichs Hannover. 1824, Sied 88: http://books.google.de/books?id=tG0AAAAAcAAJ&pg=PA88
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 148: http://books.google.de/books?id=eOI-AAAAcAAJ&pg=PA148
- ↑ http://www.gemeindeverzeichnis.de/gem1900/gem1900.htm?hannover/bremervoerde.htm
- ↑ a b c http://www.verwaltungsgeschichte.de/bremervoerde.html
- ↑ http://www.gnarrenburg.de/default.cfm?mid=32741
Weblenken
