Ben Riley

Ben Riley

Benjamin Alexander "Ben" Riley (* 17. Juli 1933 in Savannah, Georgia; † 18. November 2017 in West Islip, Suffolk County (New York)^[1]) weer en US-amerikaansch Jazz-Slagtüüchspeler.

Leven un Wirken

De Öllern vun Riley sünd mit hüm vun Georgia nah New York City trucken, as he veer Johr old weer. Dor wurr he in sien Highschool-Tiet Schöler vun den Bandleader Cecil Scott. Siet 1953 deen he in de US Army, wo he Liddmaat vun en Jazzband weer. Nah den Armeedienst hett he mit tallriek New Yorker Musikern arbeit, dorünner Randy Weston, Mary Lou Williams, Sonny Rollins, Woody Herman, Stan Getz, Billy Taylor un Johnny Griffin.

In de 1960er Johren weer he Partner vun den Pianisten Thelonious Monk, mit den he tallriek Tourneen maakt un Alben inspeelt hett. Dorneben is he in disse Tiet mit Earl Hines, Andrew Hill, Hank Jones, Barry Harris un Clark Terry uptreeden. Nahdem he fiev Johr as Lehrer an en New Yorker School arbeit harr, wurr he Midden vun de 1970er Johren Liddmaat vun dat New York Jazz Quartet un Partner vun Alice Coltrane. Dorneben weer he Liddmaat vun dat Ron Carter Quartet, mit de sien Liddmaaten Buster Williams un Kenny Barron he later en Trio billen dee. Dorut wurr mit den Tenorsaxophonisten Charlie Rouse de Band Sphere.

Nah den Dood vun Rouse hett sück de Band uplöst, Riley hett aber wieder mit Barron arbeit, dorneben aber ok mit Abdullah Ibrahim, Barney Kessel, Chet Baker, Johnny Griffin un annern. 1992 wurr he in de Coastal Jazz Hall of Fame vun sien Gebortsstadt Savannah upnommen.

Sien letzt Johren hett Riley in en Pleegheim verbrocht, aber de Musik weer, as sien Familie seggt hett, sien Een un All bit to sien Levensenn'.^[2]

Weblenken

• DNB-Katalog]
• Indrag bi Discogs (engelsch)
• Ben Riley bi Drummerworld
• Indrag bi Allmusic (engelsch)

Enkeld Nahwiesen

1. Nate Chinen: [1] Ben Riley, a Jazz Drummer Who Made Accompaniment His Art, Has Died at 84; Herutgever WBGO van’ 19. November 2017, afropen an den sülvigen Dag (engelsch)
2. Musician Ben Riley: Dies@84 full in blossom, Magazine, afropen an‘ 20. November 2017 (engelsch).

Normdaten: GND: 134498062 | LCCN: n80093138 | VIAF: 92854666 | Wikipedia-Personensöök