Bahnhoff Elsdörp (hoochdüütsch Bahnhof Elsdorf) is en lütten Oortsdeel von Wist in de Gemeen Zeven (Samtgemeen Zeven) in’n Landkreis Rodenborg, Neddersassen.
Geografie
De Oort liggt op de Zevener Geest. Dat Water ut dat Rebeed flütt över’n Osenhorster Beek na de Meh-Au hen af.
De Naveröörd sünd Frankenbossel un Rüspel in’n Noordoosten, Poitzendörp in’n Oosten, Elsdörp in’n Süüdoosten, Borg Elsdörp un Borgwall in’n Süden, Osenhorst un Wehldörp in’n Süüdwesten, Wehldörperholt in’n Westen un Brüttendörp un Wist in’n Noordwesten.
Historie
De Oortsdeel Bahnhoff Elsdörp is in dat 19. Johrhunnert von Wist ut nee grünnt worrn un hett toeerst Lütt Wist heten. Eerst as 1906 de Bahnlien Bremervöör–Wasra in düssen Afsnidd anleggt worrn is, is de Bahnhoff för dat Dörp Elsdörp in Lütt Wist boot worrn. Sietdem is de Oort Bahnhoff Elsdörp nöömt worrn.
Verwaltungsgeschicht
Dat Rebeed hett vör 1885 to dat Amt Zeven tohöört. Na 1885 weer dat in’n Kreis Zeven. 1932 is de Oort Deel von’n Kreis Bremervöör worrn un 1977 von’n Landkreis Rodenborg.
De Oort hett al jümmer to de Gemeen Wist mit bihöört. Düsse Gemeen is mit de Gemeenreform in Neddersassen an’n 1. März 1974 Deel von de Gemeen Zeven worrn.
Inwahnertall
| Johr |
Inwahners
|
| 1905-12-011. Dezember 1905[1] |
18 Lüüd, 3 Hüüs
|
Religion
Bahnhoff Elsdörp is evangeelsch-luthersch präägt un höört to dat Kaspel von de Allerhilligen-Kark in Elsdörp.
För de Kathoolschen is de Christ-König-Kark in Zeven tostännig, de siet 1. November 2006 to de Karkengemeen Corpus Christi in Rodenborg tohöört.
Weertschop un Infrastruktur
För Bahnhoff Elsdörp is de freewillige Füürwehr Wist mit tostännig.
Verkehr
Bahnhoff Elsdörp liggt an en lüttje Siedenstraat von de Landsstraat 131, de in’n Noordwesten över Wist na Zeven an de Bundsstraat 71 ran geiht un in’n Süüdoosten över Abbendörp un Hetzweeg na Scheeßl an de B 75. De lüttje Straat, an de de Oort liggt, geiht in’n Süüdwesten wieder na Osenhorst un Wehldörp un dor ok an de B 71. De B 71 wedder föhrt in’n Süden na Rodenborg un in’n Noorden över Zeven na Sürsen un Bremervöör.
De nächste Autobahn is de Autobahn 1 (Afsnidd Hamborg–Bremen). De Opfohrt 48 Elsdörp liggt so twee Kilometer in’n Süüdoosten von Bahnhoff Elsdörp an de L 131.
De nächste Bahnhoff is so bi 16 Kilometer wied weg in’n Süüdoosten de Bahnhoff Scheeßl an de Bahnlien Hamborg–Bremen. Op’n Bahnhoff an de Bahnlien Bremervöör–Wasra, na den de Oort den Naam kregen hett, hett dat von 1906 bet 1968 Personenverkehr geven.
Scholen
De Kinner ut’n Oort gaht op de Grundschool Elsdörp.
Literatur
- Dorfchronik von Wistedt: mit seinen Ortsteilen Hofkoh, Osenhorst und Bahnhof Elsdorf im Wandel der Zeit. 2013
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 197
