Bötzen (hoochdüütsch Boitzen) is en Dörp un Oortsdeel vun de Gemeen Heeßel in’n neddersassischen Landkreis Rodenborg (Wümm).
Geografie
Bötzen liggt groff in de Mitt twüschen Hamborg un Bremen in’t Rebeet vun de Harsfelder Geest. Dat Ümland is prägt vun Wischen un annere landweertschopliche Flachen und gifft alltohopen en ländlich Bild af. En lütt Wooldstück, de Schönhoop, liggt op halven Weg na Heeßel. De Oort Bötzen is noch mol opdeelt in den Oortskarn un de beiden lütten Wahnsteden Bötzenbossel un Oosterbötzen.
Twüschen Bötzen un Bötzenbossel flütt de Knüllbeek langs.
Historie
Verwaltungsgeschicht
In de Franzosentied von 1810 bet 1814 hett de Oort to de Mairie Zeven in’n Kanton Zeven höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1885 to de Böörd Heeßel in dat Amt Zeven tohöört. Na 1885 weer dat in’n Kreis Zeven. 1932 is dat Deel von’n Landkreis Bremervöör worrn un 1977 von’n Landkreis Rodenborg.
De Oort is bi de Gemeenreform in Neddersassen an’n 1. März 1974 an de Gemeen Heeßel kamen.
Inwahnertall
| Johr |
Inwahners
|
| 1824-00-001824[1] |
11 Füürsteden
|
| 1848-00-001848[2] |
103 Lüüd, 16 Hüüs
|
| 1910-12-011. Dezember 1910[3] |
184
|
| 1925-00-001925[4] |
238
|
| 1933-00-001933[4] |
250
|
| 1939-00-001939[4] |
231
|
Religion
Bötzen is evangeelsch-luthersch präägt un höört to dat Kaspel von de Vitus-Kark in Heeßel.
För de Kathoolschen is de Christ-König-Kark in Zeven tostännig, de siet 1. November 2006 to de Karkengemeen Corpus Christi in Rodenborg tohöört.
Stratenverkehr
Dör den Oortskarn Bötzen verlöppt de L 124, de Bötzen mit de Dörper Steddörp in’n Noordoosten un Heeßel in’n Süüdwesten verbinnt. Lüttere Straten föhrt na Wens in’n Noorden, na Oosterheeßel in’n Süüden un över Oosterbötzen na Weertzen, wo Ansluss an de L 142 besteiht.
Kulturell Leven
Bötzen is över de Geemen rut bekannt för sien Schüttenfest. De Schüttenvereen Bötzen un ümto e.V. ünnerhollt en Scheethall un Scheetstännen in jemehr Anlaag in’n Schönhoop, woneem ok dat Fest utricht warrt. In’n Süden an’n Dörpsrand liggt butendem en Sportplatz vun’n TuS Heeßel, de Enn vun de 1980er Johren in Bedrief nahmen worrn is.
- ↑ C. H. Jansen: Statistisches Handbuch des Königreichs Hannover. 1824, Sied 72: http://books.google.de/books?id=tG0AAAAAcAAJ&pg=PA72
- ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 141: http://books.google.de/books?id=eOI-AAAAcAAJ&pg=PA141
- ↑ http://www.gemeindeverzeichnis.de/gem1900/gem1900.htm?hannover/zeven.htm
- ↑ a b c http://www.verwaltungsgeschichte.de/bremervoerde.html
