Antson weer in de Jöögd as Lichtathlet, Tennisspeler un Eishockeyspeler spoodriek, bevör he sück mit Iesflinkloop befaaten dee. Af 1963 wurr he bi Kalev Tallinn vun den ehmalgen Olympiasieger Boris Schilkow traineert, de hüm an de Weltspitze führen dee. 1964 wunn he bi de sowjeetsch Meesterschapen den Titel över 10.000 m, wurr Tweet över 5000 m un keem in’ Mehrkamp up den fievten Platz. In dat sülvige Johr geev he sien Debüt in internatschonalen Wettbewarfen un wurr Mehrkamp-Europameester. Bi de Olympisch Winterspelen 1964 in Innsbruck wunn he de Goldmedaille över 1500 m (vör Kees Verkerk un Villy Haugen) un wurr Fievt över 10.000 m. In’ Ansluss stell he in Oslo mit 4:27,3 min en Weltrekord över 3000 m up. Bi de Mehrkamp-Weltmeesterschapen 1964 keem he över 500 m to Fall un belegg in de Gesamtwertung blots den 15. Rang. Dennoch wurr hüm an dat Enn’ vun de Saison de Oscar Mathisen Memorial Trophy tospraaken.
Bi de sowjeetsch Mehrkampmeesterschapen wunn Antson 1965 Sülver, 1966 Bronze, 1967 Gold un 1968 weer Sülver. Todem hett he 1967 un 1968 den sowjeetschen Meestertitel över 1500 m haalt. Internatschonal kunn he 1967 bi de Mehrkampmeesterschapen kein Medaille winnen, Sowohl bi de Mehrkamp-Weltmeesterschapen as ok bi de Mehrkamp-Europameesterschapen keem he up den veerten Platz.
Antson gung bi de Olympisch Winterspelen 1968 in Grenoble as Titelverteidiger nochmals över 1500 m an den Start un wurr tietgliek mit sien Landsmann Waleri Kaplan Twalft. Ansluutend hett he sück vun den aktiven Sport torüchtrucken un hett fortn in den Sportverband vun de Estnischen SSR arbeit. Nah de Singen Revolutschoon weer Antson in dat Estnisch Olympiakomitee tätig un wurr bi de Olympisch Winterspelen 1992 to’n eersten olympischen Fahnendräger vun Eestland nah de Lotlöösen vun de Sowjetunion.
