Mit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. Dat Amtsgericht Töst is dor denn nee schapen worrn as Gericht för dat Amt Mesborg.
1859 is ut dat Amt Mesborg dat Amt Töst worrn. 1885 is dat Amt Töst Deel von’n Kreis Horborg worrn, aver för dat Gericht hett sik nix ännert. 1886 aver is de Gemeen Fischbeek mit de Öörd Neegraven, Scheedholt un Fischbeek in’n Gerichtsbezirk von dat Amtsgericht Horborg wesselt, von wegen, dat veel lichter na Horborg hentokamen weer as na Töst.
Amtsrichters
1852–1855: Heinrich Philipp Kuntze
~1858: Hermann Wuthmann
Gerichtsgebüüd
Dat Gericht is in de Straat Ünner de Linnen ünnerbröcht, in en Gebüüd, dat 1857 in’n Hannöverschen Rundbagenstil boot worrn is. De Stil düüdt dor op hen, dat de Hoffboinspekter Christian Heinrich Tramm dat Gebüüd hett boon laten.
1993 is dat Gericht noch eens wedder utboot worrn.
