Alexander „Sandy“ MacDonald (* 10. November 1786 op Skye; † 31. Mai 1856 in Aken) weer en brietschen Offzeer.
MacDonald is 1786 op Skye as Söhn von Susannah, borene MacAlister (üm 1754–20. Juli 1820), un Norman MacDonald of Scalpay (1740–28. Dezember 1823) boren.[1]
In en Öller von 17 Johr is he in de Armee intreden un an’n 3. Dezember 1803 Sekondeleutnant bi de Royal Artillery worrn.[1] An’n 1. Mai 1804 is he to’n Leutnant opstegen un to’n Hauptmann an’n 1. Oktober 1812.[1] An’n 18. Juni 1815 is he Brevet-Major bi de Armee worrn un an’n 21. Juni 1817 Brevet-Oberstleutnant.[1] An’n 12. Dezember 1826 is MacDonald Hauptmann bi de Royal Artillery worrn, an’n 10. Januar 1837 Brevet-Oberst, an’n 13. August 1840 Oberstleutnant bi de Royal Artillery, an’n 9. November 1846 Generaalmajor bi de Armee un an’n 20. Juni 1854 Generaalleutnant bi de Armee.[1]
In’n aktiven Insatz as Soldaat keem he toeerst ünner Generaal David Baird, as de Briten 1805 de Kapkolonie innahmen hebbt.[1] Von dor güng he in dat sülve Johr mit Generaal William Beresford na Buenos Aires, wo he twee Maal verwunnt worrn is.[1] He weer bi de Slacht von Montevideo 1807 mit dorbi.[1]
Von Juni 1809 bet Juli 1814 weer he in’n Peninsular War un in Frankriek insett.[1] He hett 1809/1810 an dat Gefecht an de Côa un de Slacht von Buçaco deelnahmen, 1811 an de Slachten von Redinha, Pombal, Condeixa un Foz de Arouce, 1812 an de Slachten von Fuentes de Oñoro un Salamanca un dat Gefecht von San Munoz, 1813 an de Slacht von Vitoria, de Belagerung von San Sebastián un de Slacht von de Pyrenäen un 1814 an de Gefechten von Gave d’Oloron un Aire un de Slacht von Tolouse.[1] För sien Deelnahm an’n Feldtog op de Iberische Halvinsel hett he de Army Gold Medal mit acht Spangen kregen.[1]
In de Slacht von Waterloo is he swoor verwunnt worrn un hett de Waterloo Medal kregen.[1] Ok den Russ’schen Orden von de Hillige Anna hett he kregen un is Companion of the Order of the Bath worrn.[1]
He is an’n 25. Juni 1829 as Nafolger von Edward Codd Supperndent von Brietsch-Honduras worrn, wat he bet Januar 1830 bleven is, as he dat Amt an Francis Cockburn afgeven hett. In’n Januar 1837 is he noch en tweet Maal Supperndent worrn, wat he bet Juni 1843 weer, as em Charles St. John Fancourt aflööst hett.
In’n Mai 1830 hett MacDonald dat Eiland Roatán (to de Tied Deel von de Zentraalamerikaansche Kunfederatschoon) överfullen un innahmen. De Briten hebbt sik dor aver nich lang hollen. 1839 hett he Roatán (nu Deel von Honduras) en tweet Maal för de Briten innahmen, nadem de Kummandant von Roatán aflehnt harr, dat Lüüd von Grand Cayman Island dor siedeln dröfft.
MacDonald weer verheiraadt mit Susanna Strangways.[1]
- ↑ a b c d e f g h i j k l m n John MacInnes: The Brave Sons of Skye. Eyre and Spottiswoode, 1899, Sied 47
