ရန်ကုန်အထူးကုဆေးရုံသစ်ကြီး သည် ရန်ကုန်မြို့၊ မြို့လယ်တွင် တည်ရှိသည့် တည်ဆောက်နေဆဲ အထူးကုဆေးရုံတစ်ခု ဖြစ်သည်။ ဆေးရုံသည် အထူးကုဝန်ဆောင်မှုများကို ပေးအပ်မည် ဖြစ်သည်။ ဤဆေးရုံသည် မြန်မာနိုင်ငံ၏ ပထမဆုံးသော cerebral နှင့် cardiovascular ရောဂါများအတွက် သင်ကြားရေးနှင့် သုတေသနအင်စတီကျုတစ်ခု ဖြစ်သည်။[၁][၂][၃]
ဆေးရုံသည် လမ်းမတော်မြို့နယ် မင်းရဲကျော်စွာလမ်းနှင့် ပြည်လမ်းထောင့်တွင် တည်ရှိသည်။ အထွေထွေရောဂါကု ဆေးရုံသစ်ကြီး (ရန်ကုန်)နှင့် ခုတင်(၅၀၀)ဆံ့ အထူးကုဆေးရုံကြီး ရန်ကုန်) တို့တည်ရှိရာလမ်း၏ တစ်ဖက်တစ်ချက်တွင် တည်ရှိသည်။[၂]
ဤဆေးရုံတည်ဆောက်မှုကို JICA က အမေရိကန်ဒေါ်လာ ၇၇ သန်း ထောက်ပံ့ကာ တည်ဆောက်ခဲ့သည်။ ထို့ကြောင့် ဤစီမံကိန်းသည် မြန်မာနိုင်ငံတွင် အကြီးဆုံးသော ကူညီထောက်ပံ့ပေးသည့် စီမံကိန်း ဖြစ်သည်။ ကျန်ရှိသည့် ကုန်ကျစရိတ်ဖြစ်သည့် အမေရိကန်ဒေါ်လာ ၂၇ သန်းကို မြန်မာအစိုးရက ပေးရမည် ဖြစ်သည်။[၄][၃] ဆေးရုံ၏ ပန္နက်တင်အခမ်းအနားကို ၂၀၁၉ ခုနှစ်၊ ဧပြီလ ၂၈ ရက်နေ့တွင် ကျင်းပခဲ့သည်။ ဆေးရုံကို ၂၀၂၁ ခုနှစ်၊ ဧပြီလ ၃၀ ရက်နေ့တွင် ပြီးစီးရန် စီစဉ်ထားသည်။[၃]
အထပ် ၇ ထပ်ပါဝင်ပြီး ၂၇၀၀၀ စတုရန်းမီတာ (၂၉၀၀၀၀ စတုရန်းပေ) ရှိသည့် အဆောက်အဦတွင် ခုတင် ၃၁၆ ခု ပါဝင်သည်။ ICU အခန်းတစ်ခုစီတွင် ခုတင် ၂၀ ကျော် ပါဝင်မည် ဖြစ်သည်။[၁][၄] ရန်ကုန်ပြည်သူ့ဆေးရုံကြီးမှ neurosurgery, neurology, cardiac surgery, နှင့် cardiology စသည့် ဌာနလေးခုတို့ကို ဤဆေးရုံအသစ်သို့ နေရာပြောင်းရွှေ့ခဲ့သည်။ ဤဆေးရုံသစ်ကြီးသည် ဆေးတက္ကသိုလ် (၁) ရန်ကုန်၏ အနီးတွင် တည်ရှိပြီး ထိုတက္ကသိုလ်၏ သင်ကြားရေးဆေးရုံလည်း ဖြစ်သည်။[၃]
ကိုးကား
