Sol

L Sol (simbolo astronomico: ; de l lhatin Sol) ye la streilha ne l centro de l Sistema solar. Atualmente, sabe-se que an torno del grabitan pul menos uito planetas, quatro planetas nanos, 1.600 asteróides, 138 satélites i un grande númaro de cometas. Sue massa ye 333.000 bezes la de la Tierra i l sou belume 1.400.000 bezes l belume de l nuosso planeta. La çtáncia de l nuosso planeta al Sol ye, por defeniçon, 1 ounidade astronómica (UA) (cerca de 150 000 000 Km). La luç solar demora 8 minutos i 18 segundos para chegar a la Tierra.

Strutura solar

L Sol, tal cumo las restantes streilhas, ye ua sfera de plasma que se ancontra an eiquilíbrio heidrostático antre las dues fuorças percipales que ágen drento del: para fura la presson termodinámica, porduto de las altas temperaturas anternas, i para drento la fuorça grabitacional. La strutura solar puode ser dibedida an dues grandes regiones: l anterior i la atmosfera, antre eilhas se ancontra ua fina camada, que puode ser cunsidrada la superfice, chamada fotosfera.

L anterior solar ten trés regiones bien defrentes: l núcleo, que ye adonde se porduz la fuson nuclear, que trasforma la massa an einergie. Arriba desta achamos la region radioatiba i por redadeiro la region cumbetiba. Nanhue destas regiones puode ser ouserbada de forma direta yá que la radiaçon ye cumpletamente absorbida (i remetida) i l coincimiento que tenemos deilhas ye atrabeç de modelos teóricos ó ouserbaçones andiretas, percipalmente por meio de la heiliosismologie.

Superfice

Por cima de la region cumbetiba stá la fotosfera cun 100 Km de spessura i aparéncia granulada - esso ye chamado de granulaçon fotosférica. Ls gránulos son, na rialidade, ls topos de células de cumbeçon que trazen l plasma caliente zde l anterior solar. Un gránulo ten an torno de 1000 km de diámetro

Outras formaçones notables de la fotosfera son las manchas solares, regiones mais fries que paréncen mais scuras que sous alredores mais calientes i mais brilhantes. Las manchas solares son associadas a antensos campos magnéticos ó perturbaçones desses campos. L total de manchas solares i de la atebidade relacionada baria antre un mínimo i un mássimo nun ciclo de onze anhos.

La luç eirradiada pula fotosfera nun ye cumpletamente atenuada pulas camadas superiores i antoce cumbirte-se na region mais atiradeira que podemos ouserbar de l Sol. Na fotosfera, la eimisson acunte an todas las bandas de l spetro lhuminoso porduzindo la luç branca caratelística de l Sol al uolho nu. La region ancontra-se a ua temperatura média de 5.775 K (ó 5.502 ºC) i ten ua densidade de 10¹⁴ a 10¹⁵ partículas por cn³.

Atmosfera

Arriba de la fotosfera stá la atmosfera. La purmeira camada, lougo arriba de la fotosfera, ye la cromosfera, cuja temperatura barie de l 6.000 K até ls 30.000 K, cun ua spessura duns 2.300 Km, anque eisiste muita cuntrobérsia a respeito.

La camada mais sterna chama-se corona, i sue temperatura bai de 1 milhon até bários milhones de graus Kelvin. An cuntrapartida la densidade de la corona ye mui baixa, sendo de 10¹⁰ cn⁻³ an sue base i deminuindo an direçon ouposta al centro de l Sol. La corona nun ten lhemite superior. Puode-se dezir que eilha se stende pul sistema solar anteiro. Antre la cromosfera i la corona hai ua streita faixa chamada region de trasiçon. Un de ls grandes porblemas de la física solar ye splicar que mecanismo cunsigue oumentar la temperatura de la atmosfera solar de l acerca de 5.500 K de la fotosfera pa l milhon de graus Kelvin de la corona.

Ciclo solar

L ciclo solar ten muitos eifeitos amportantes, que anfluencian la Tierra. Studos de heiliosismologie eisecutados a partir de sondas spaciales premitiran ouserbar ciertas "bibraçones solares", an que la frequéncia crece cul oumiento de la atebidade solar, acumpanhando l ciclo de 11 anhos de eirupçones, la cada 22 anhos eisiste la manifestaçon de l chamado heimisfério dominador, para alhá de la mobimentaçon de las struturas magnéticas an direçon als pólos, que resulta an dous ciclos de 18 anhos cun ancremiento de la atebidade geomagnética de la Tierra i de la bariaçon de la temperatura de l plasma na eionosfera de la Tierra.