Црква „Св. Христофор“ - Крстоар

Свети Христофор
Поглед на црквата
македонска православна црква
Епархија	Преспанско-пелагониска
Архијерејско намесништво	Битолско
Парохија	Бистричка
Местоположба
Координати	40°59′19″N 21°20′29″E
Место	Крстоар
Општина	Битола
Држава	Македонија
Општи податоци
Покровител	Свети Христофор
Изградба	XIX век
Завршено	1837
Архитектонски опис
Архит. тип	еднокорабна

Свети Христофор — главна манастирска црква на Крстоарскиот манастир во битолското село Крстоар.^[1]

Местоположба

Црквата е сместена на околу 5,5 километри од градот Битола. До него води асфалтен пат, најпрвин до селото Крстоар. Од селото, асфалтниот пат продолжува во должина од еден километар, на моменти стрмен и тесен.^[2]

Дополнително, до манастирот може да се пристигне и преку соседното село Буково, од каде преку црквата „Воведение на Пресвета Богородица“, води пешачка патека.^[2]

Историја

Црквата била подигната во четвртата декада од XIX век. Претрпела сериозна обнова во 1926 година.^[2]

Архитектура

Претставува прилично голема еднокорабна градба, со петстрана апсида на исток и влезови кон наосот од западната и северната страна, а директно во олтарниот простор може да се влезе преку посебната врата на југоисточната страна.^[2]

Историјата на храмот е испишана на мермерната плоча на фасадата над северниот влез.^[2]

Фрескоживопис

Живопис се забележува и на надворешноста, односно има насликана претстава на Свети Христофор над западниот влез. Насликан е во медаљон, претставен во цел раст со повеќето негови атрибути. На рамото го носи малиот Христос, додека во едната рака држи копје, а со левата го придржува маченичкиот крст. Покрај тоа, запишана е 1926 година како година на сликање на претставата.^[2]

Во храмот нема сочувано ѕидно сликарство од изградбата на црквата. Оној живопис што може да се сретне во апсидата на црквата и на темето од сводот, насликано е за време на нејзината обнова во 1926 година.^[2]

Иконостас

Иконостасот во црквата бил направен во третата декада од XX век. Бил направен со три реда на икони, царски двери и високи врати на јужниот и на северниот дел.^[2]

Во црквата се зачувани само неколку празнични икони од XIX век.^[2]

Галерија

• 
  Поглед на црквата
• 
  Знак за изградбата на црквата
• 
  Влезот во црквата
• 
  Кратка историја на храмот
• 
  Дел од храмот
• 
  Апсидата на храмот
• 
  Страничен поглед
• 
  Апсидата на храмот

Историски фотографии

• 
• 
• 

Поврзано

• Битолско архијерејско намесништво
• Бистричка парохија
• Крстоар

Наводи

1. Јелена Павловска, Наташа Ниќифоровиќ и Огнен Коцевски (2011). Валентина Божиновска (уред.). Карта на верски објекти во Македонија. Менора - Скопје: Комисија за односи во верските заедници и религиозните групи. ISBN 978-608-65143-2-7.
2. Палигора, Ристо (декември 2011). „Студија за манастирски туризам на Баба Планина“ (PDF). Битола: Центар за развој на Пелагонискиот плански регион. Архивирано од изворникот (PDF) на 2013-12-28. Посетено на 29 април 2019.

Надворешни врски

• Црква „Св. Христофор“ - Крстоар на Ризницата ^?