Факултет за физичко образование, спорт и здравје

Факултет за физичко образование, спорт и здравје (ФФОСЗ)

Официјално лого на Факултетот за физичко образование, спорт и здравје
Вид	Државен факултет
Основан	15 јули 1977
Академска припадност	Универзитет „Св. Кирил и Методиј“
Декан	Проф. д-р Влатко Неделковски
Место	Скопје, Македонија
Мреж. место	www.ffosz.ukim.edu.mk

Факултетот за физичко образование, спорт и здравје (ФФОСЗ) во Скопје е јавна високо­образовна установа како единица во состав на Универзитетот „Св. Кирил и Методиј“ во Скопје. Факултетот врши високообразовна дејност од прв, втор и трет циклус на студии, научноистражувачка, приме­ну­вачка и високостручна дејност и од научноистражувачкото подрачје општествени науки, во полето кинезиологија како и во сите научни полиња што се во врска со основната дејност на Факултетот.^[1]

Историја на факултетот

Факултетот е основан на 15.7.1977 година, како Факултетот за физичка култура во Скопје.

Факултетот е основан со Законот за основање на Факултетот за физичка култура (Сл. весник на СРМ бр. 30/77 од 15.7.1977 година), донесен од Собранието на Социјалистичка Република Македонија.

Со одлука на наставно-научниот совет број 0201-869/21од 18.6.2013 година изврешна е промена на називот на Факултетот за физичка култура - Скопје. Новиот пол назив на Факултетот е: Република Македонија, Универзитет „Св. Кирил и Методиј“ Скопје, Факултет за физичко образование спорт и здравје – Скопје“. (Измената е објавена во Универзитетскиот гласник број 278 од 4 февруари 2014 година).^[1]

Мисија на факултетот

Ценејќи ја 40-годишната традиција на Факултетот за физичко образование, спорт и здравје при Универзитетот „Св.Кирил и Методи” од Скопје, може слободно да кажам дека истата претставува најстара и најреномирана наставно-научна институција во Република Македонија од подрачјето на кинезиологијата. Успешната работа на Факултетот од 40-годишниот период на неговото постоење се темели пред се на извонредните кадровски потенцијали кои успеаја да имплементираат поголем број студиски програми на додипломско, постдипломско и докторско ниво. Во тој контекст главен императив, односно мисија на факултетот претставува:

• Унапредување на квалитетот на образовните услуги;
• Создавање на квалитетни и конкурентни кадри на пазарот на трудот во земјава и странство и
• Подигнување на образовното ниво на целата македонска популација (се разбира пред се од доменот на кинезиологијата).

Студентите се темел за постоењето на секоја високообразовна институција, а во таа смисла и на нашиот Факултет. Како рамноправни членови на Академската заедница, континуирано се трудиме истите да го заземат правото место и значење. Младите колеги, во целост се третираат како вредност во која безрезервно инвестираме труд и знаење. На овој начин сигурни сме дека по нивното дипломирање истите успешно ќе го претставуваат нашиот Факултет во сите сфери на општественото живеење и истите ќе бидат нашите најдобри амбасадори. На крај, би сакалe на сите сегашни и идни студенти да им честитаме за вистинскиот избор на високообразовна институција и им посакуваме успешен академски живот.^[2]

Студиски програми

Додипломски студии

Факултетот нуди 2 наставни програми на прв циклус на студии во следните области^[3]:

• Физичко и здравствено образование (ФЗО) со времетраење од 4 години.

1. На оваа насока студентите може да се запишат редовно или вонредно и по дипломирањето се стекнуваат со 240 ЕКТС кредити.
2. По дипломирањето студентите се стекнуваат со титулата „Дипломиран професор по физичко и здравствено образование“.

• Спортски тренери (СТ) со времетраење од 3 години.

1. На оваа насока студентите може да се запишат само вонредно и по дипломирањето се стекнуваат со 180 ЕКТС кредити.
2. По дипломирањето студентите се стекнуваат со титулата „Дипломиран спортски тренер во избраната област или спорт“. Пример: Дипломиран професор по фудал.
3. За оваа насока е потребно студентите да изберат еден спорт или област за изучување.

Примери за насоки или области:

• Спортски тренер по алпинизам и спортско качување;
• Спортски тренер по кондициска подготовка;
• Спортски тренер по фитнес и бодибилдинг;
• Спортски тренер по фудбал;
• Спортски тренер по кошарка;
• Спортски тренер по ракомет итн.

Магистерски студии

Факултетот нуди 3 наставни програми на втор циклус на студии во следните области^[4]:

• Кинезиологија со времетраење од 1 година (2 семестри) или 2 години (4 семестри).
• Спортски менаџмент со времетраење од 1 година (2 семестри).
• Спортски туризам со времетраење од 1 година (2 семестри).

Докторски студии

Факултетот нуди 1 наставнa програмa на трет циклус на студии во следната област^[5]:

• Кинезиологија со времетраење од 3 години (6 семестри).

Органи

Органи на факултетот се наставно-научен совет, декан и деканатска управа.^[6]

Наставно-научен совет (ННС)

Наставно-научниот совет е орган на управување и стручен орган на факултетот. Наставно-научниот совет го сочинуваат редовните професори, вонредните професори и доцентите кои се во работен однос на факултетот. Во наставно-научниот совет свои претставници избира и факултетското студентско собрание.^[6]

Декан

Деканот на факултетот, е раководен орган. Деканот го претставува факултетот, во земјата и странство во согласност со статутот на универзитетот и статутот на факултетот. Вршењето на должноста декан и продекан, е неспојливо со вршење на друга јавна функција или функција во политичка партија.^[6]

Деканат на Факултетот за физичко образование, спорт и здравје^[7]

Функција	Име и презиме	Предмет
Декан	Проф. д-р Влатко Неделковски	Ракомет
Продекан за настава	Проф. д-р Андријана Мисовски	Одбојка
Продекан за меѓународна соработка и наука	Проф. д-р Небојша Марковски	Фудбал

Деканатска управа

Деканатската управа, е орган на управување на факултетот и може да има најмалку пет, а најмногу 15 члена. Деканатската управа, ја сочинуваат:^[6]

• Деканот и продеканите;
• Раководителите на внатрешните наставно-научни организациони единици определени со статутот на факултетот;
• Најмалку еден член избран од факултетското студентско собрание.

Надворешни врски

• Официјална веб-страна на Факултет за физичко образование, спорт и здравје

Наводи

1. „Универзитетски гласник Бр. 453, 15 октомври 2019“ (PDF).
2. „Мисија – Факултет за физичко образование, спорт и здравје“. Посетено на 2024-09-22.
3. „Наставен план – Прв циклус студии – Факултет за физичко образование, спорт и здравје“. Посетено на 2024-09-22.
4. „Наставен план – Втор циклус студии – Факултет за физичко образование, спорт и здравје“. Посетено на 2024-09-22.
5. „Наставен план – трет циклус студии – Факултет за физичко образование, спорт и здравје“. Посетено на 2024-09-22.
6. „ЗАКОН ЗА ВИСОКОТО ОБРАЗОВАНИЕ“ (PDF).
7. „Деканат – Факултет за физичко образование, спорт и здравје“. Посетено на 2024-09-22.