PROFILBARU.COM

**Бад Бентхајм**
	Бад Бентхајм Bad Bentheim ;
	Градот со замокотГрадот со замокот
	Бад Бентхајм
	Управа
Земја	Германија
Покраина	Долна Саксонија
Округ	Грофовија Бентхајм
Градоначалник	Фолкер Панен (СДП)
	Основни податоци
Површина	100,16 км2
Надм. височина	49 м
Население	16.251 (31 декември 2022)
- Густина	162 жит/км2
	Други информации
Часовен појас	CET/CEST (UTC+1/+2)
Рег. табл.	NOH
Пошт. бр.	48455
Повик. бр.	05922; 05924 for Gildehaus
Портал	http://www.stadt-badbentheim.de/index/
Местоположба на градот Бад Бентхајм во рамките на округот Грофовија Бентхајм
	Карта
Координати	52°18′11″N 7°09′35″E / 52.30306° СГШ; 7.15972° ИГД

Бад Бентхајм (до 1979 г. само Бентхајм; германски: Bad Bentheim; долногермански: Beantem) — град во округот Грофовија Бентхајм, во сојузната покраина Долна Саксонија, Германија.

Градот се наоѓа на границата со покраината Северна Рајна-Вестфалија и со Холандија. Тој е исто така признаена покраинска бања, па оттаму доаѓа и ознаката „Бад“. Во него се наоѓа замокот Бентхајм, што е симбол на градот.

Географија

Раширување на градот

Границата на градот е долга 49 километри, при што растојанието север-југ е 14 километри, додека растојанието запад-исток е 12 километри. Градското подрачје има површина од 100,16 км².^[2]

Соседни општини

Градот се граничи на север со окружниот град Нордхорн, на североисток со општината Истерберг, на исток со Квендорф и Шитторф (сите во округот Грофовија Бентхајм), на југ со Охтруп (округ Штајнфурт) и Гронау (округ Боркен), а на запад со Лосер (Холандија, покраина Оверајсел).

Блиски поголеми градови се Минстер и Оснабрик во Германија и Енсхеде во Холандија.

Градски единици

Градот е составен од градското јадро на Бад Бентхајм и местата Ахтерберг, Бардел, Гилдехаус, Хагелсхек, Холт и Хар, Зирингхек, Валдзајте и Вестенберг.

Историја

Првото документирано споменување на Бад Бентхајм е околу 1050 година како Бинитхем (Binithem). Постојат повеќе етимолошки објаснувања за самото име. Така, името може да се однесува на ситник (Binsen на германски), растение кое растело на мочурливата област порано. Исто така се претпоставува дека името, како и холандската област Твенте, доаѓа од времето на Тубантите.

Бад Бентхајм, поранешна грофовска резиденција, поседува богата историја. Со векови, градот бил средиште на истоимената грофовија. Под пруска власт, Бентхајм станал амт, а од 1857 до 1973 година бил седиште на основен суд.^[3] Во 1945 година, британската окупациска влада на Бентхајм му го укинала статусот на окружен град и го преместила окружното седиште во Нордхорн, кој бил географски средишно поставен во округот.

Знаменитост на градот е моќниот замок на грофовите од Бентхајм, кој бил првпат споменат во документ од 1116 година. Околу 1711 година биле откриени лековити сулфурни извори, од кои подоцна се развиле термални бањи и клиника. Од 1865 година, Бентхајм поседува градски права.

По Втората светска војна постоеле планови, големи делови од Северозападна Германија да бидат припоени кон Холандија, како и Бентхајм. Овие планови на крајот не се оствариле.

Од 6 јуни 1979 година, градот го носи името Бад Бентхајм. Местото Гилдехаус од 1982 година е признато одморалиште.

Како бентхајмско злато се означувал бентхајмскиот песочен камен, кој бил копан во самиот град и во Гилдехаус. Трговијата (XV-XVIII век) се раширила надвор од границите на Грофовијата Бентхајм, во областите Минстерланд, Источна Фризија, во Холандија, како и до Белгија и Данска. Позначајни градби градени со бентхајмскиот песочен камен се Кралската палата во Амстердам, театарот и главната катедрала во Антверпен, католичката црква во Орхус, кулата на црквата „Св. Мартин“ во Гронинген, како и Градското собрание во Минстер. Наводно, постаментот на Статуата на Слободата во Њујорк е исто така изградена од бентхајмскиот песочен камен.

Припојувања

На 1 април 1929 година биле припоени општината Бентхајм-Бауершафт и Гутсбецирк Бентхајм. Во рамки на долносаксонската општинска реформа, на 1 март 1974 година кон градот била припоена општинската заедница Гилдехаус (составена од Гилдехаус, Ахтерберг, Хагелсхек, Холт и Хар, Валдзајте и Вестенберг, како и општините Бардел и Зирингхек.

Политика

Градски совет

Градскиот совет се состои од 30 избрани членови, што одговара за градови со број на жители помеѓу 12.001 и 15.000 жители.^[4] Членовите се избираат на општи избори на секои пет години.

На последните општински избори на 12 септември 2021 година биле добиени следниве резултати:^[5]

Партии и листи		Удел	Места
CDU	Демохристијански сојуз на Германија	39,26%	12
SPD	Социјалдемократска партија на Германија	36,35%	11
Grüne	Сојуз 90/Зелени	11,50%	3
FDP	Слободна демократска партија (Германија)	10,82 %	3
Linke	Левица (Германија)	2,06 %	1
Вкупно		100%	30
Излезност		53,28%

Градоначалник

Градоначалник на градот Бад Бентхајм е Фолкер Панен (SPD).

Список на претходни градоначалници
Градоначалник	Период
Јохан Крабе	1899–1930
Кристијан Микелсен	1930–1937
Карл Рапиц	1938–1944
Карл Брозе (NSDAP)	1944–1945 (9 месеци)
Херман Ламерс	1945
Јохан Шите	1946–1949
Август Липолд	1949–1956
Герхард Крабе (CDU)	1956–1964
Дитрих Зомберг (CDU)	1964–1991
Хорст Винклер (SPD)	1991–1996
Гинтер Алсмајер (CDU)	1996–2006
Фолкер Панен (SPD)	од 2006