Yeyen Tumena (lahia di Padang, Sumatera Barat, 16 Mei 1976; umua 48 taun) adolah surang pamain sarato palatiah sepakbola Indonesia. Yeyen Tumena pernah bamain di Tim Nasional Indonesia sabagai pamain belakang atau defender. Sabagai surang pamain batahan Yeyen dikenal cukuik tangguh. Yeyen adolah salah surang pamain hasil program Primavera basamo jo pamain lainnyo sarupo Kurniawan Dwi Yulianto, Sugiantoro, Bima Sakti sarato nan lain-lain.[1]
Karier
Yeyen tatariak jo sepakbola sajak masih ketek. Satiok pulang sakola inyo salalu singgah di lapangan sepakbola punyo PT. Semen Padang, jo serius mamparatian para pamain PSP Padang balatiah. Suatu katiko, salah surang pamain PSP, Suhatman Imam maajainyo caro manyipak jo bamain bola.
Karano bakaik sepakbola-nyo nan gadang, akhianyo PSP-pun marekrutnyo jadi palapih pamain senior pado umua 16 taun. Salanjuiknyo karier sepakbolanyo samakin basinar katiko tapiliah sabagai salah surang pamain nan dikirim ka Italia dalam proyek Primavera.[2]
Pado tanggal 10 Desember 1996, dalam suatu patandiangan di putaran final Piala Asia malawan timnas Uni Emirat Arab di stadion Jeque Zayed, Abu Dhabi, Yeyen babanturan kareh jo kapten tim lawan sahinggo inyo mandarito cidera parah. Sajak itu karier jo pamornyo-pun manurun.
Sapanjang karier profesionalnyo di sepakbola, Yeyen sempat bamain dibabarapo klub, diantaronyo PSM Makassar, Persija Jakarta, PSMS Medan, Persma Manado sarato nan lain-lain.
Sasudah indak aktif lai sabagai pamain, Yeyen bakarier sabagai komentator sepakbola sarato ikuik pulo maurus pasepakbolaan nasional diantaronyo jo manjadi palatiah tim yunior nasional sarato anggota tim pancari bakaik Badan Pambinaan jo Pangambangan Usia Mudo PSSI.[3] Disampiang itu inyo tajun pulo ka dunia bisnis manjadi surang pangusaho.
Rujuakan
Pautan lua
